Froilan, Warriors magsambunot karon

CEBU, Philippines - Magsambunot karong adlawa ang team Froilan ug Warriors sa crossover semifinals sa 1st Estaca Women's Volleyball Open didto sa Brgy. Estaca, Compostela.

Ang Froilan pangulohan ni former RP Youth member Genie Sabas ug RP beach volley team member Jusabelle Brillo uban sa kanhi Nestea Fit Beach Volley champs Apple Eve Saraum ug Erika Camille Verano.

Sa laing duwa sa semis, ang Roble Shipping Lines makigsangka batok sa University of San Carlos.

Motimon sa Roble Shipping mao sila si Mechelle Matuguina, Cheche Bohol ug SWU stalwarts Raphril Aguilar, Lorie May Layno ug Mary Luilyn Pacinio ug Abegail Praca sa USJ-R.

Sa laing bahin, ang USC magsalig nilang Methosheena Bate, Jerymie Montalvo, Niña Irish Cortes, Suzette Panis ug Akemi Aono.

Ang mga modaog maoy magsangka sa finals karong hapon.

Ang kampiyon mobulsa og P5,000, ang ikaduha makaangkon og P3,000, ang ikatulo makadawat og P2,000 ug ang ikaupat makaangkon og P1,000.

Gipasiugdahan sa Purok Mahogany Youth Organization sa abag sa Cebu Volleyball Association (CEVA) ug Sunsport, ang kompetisyon usa sa mga kalihukan sa tinuig nga kapistahan sa Holy Trinity, ang mahal nga patron sa Brgy. Estaca.   (BANATNEWS)