Adlawan misidlak sa Mactan

CEBU, Philippines - Human niya gisakmit ang ikawalong dapit sa FIM-Asia Motocross Championship, si international motocross sensation Jon Eleazar Adlawan sa PSR Racing misidlak na usab dihang gidominar ang expert category sa Arturo Radaza Underbone Challenge 2010 niadtong Domingo didto sa Brgy. Basak,   Lapu-Lapu City.

Si Adlawan subling mipakita sa iyang katakus aron makuha ang korona gikan ni Gary Caneda Jr. sa CTR Racing Team, nga maoy PTT Rider of the Year (ROY) sa miaging tuig.

Gisundan si Adlawan ni Menard Ladeza sa Matt Racing, samtang sila si Jonathan Gran Ladeza ug Rama maoy mipahiluna sa ikatulo ug ikaupat nga dapit.

Gawas sa pagsakmit sa titulo sa expert category, nanghawod usab si Adlawan sa special motocross event batok nila ni Jubenile Abellar ug Ian Reyes nga mipahiluna sa ikaduha ug ikatulong dapit.

Si Alphy Bartolada sa UMC Team maoy nag-una sa novice category, samtang ang iyang teammate Wilt Cham Siplon maoy nidominar sa beginners category.

Ang maong lumba gipasiugdahan sa Power Sports Racing (PSR) Promotions ubos sa liderato ni Jonas Adlawan ug race director Edsel Odulio uban sa suporta sa PTT Lubricants, Skygo Motorcycles ug sa Lapu-Lapu City Government.    (BANATNEWS)