Dark Green, 4-0 na sa SFAA cagefest

CEBU, Philippines - Nagpabiling lig-on ug wala pa gihapon makatilaw og pilde ang Dark Green sa pagpangulo ni Rick Dayondon dihang ilang gipilde ang Yellow Team, 73-65 alang sa ilang 4-0 nga baraha sa Still Fighting Athletics Association (SFAA) basketball tournament diha sa Cebu Eastern College (CEC) covered court.

Ang Dark Green nabiyaan og uno punto, 15-16 sa unang kuwarter, apan nagpauwan kini og mga puntos sa second quarter aron pagposte og 51-38 nga bentaha ug wala na kini molingi pa sukad niadto.

Si Bobby Emol maoy topscorer sa Dark Green pinaagi sa iyang 19 puntos, gisundan ni Rex Domein nga adunay 16 puntos. Si Dayondon miamot og 12 puntos ug si Jorge Pareja mitampo og 10 puntos.

Sa laing duwa, ang Scarborough mipilde sa TNT sa iskor nga 86-84 aron tablahon ang ilang win-loss record ngadto sa 2-2, samtang ang Team Black nagsalig sa kainit ni Michael Sumayang aron panitan ang SWAN-RTW sa iskor nga 91-66.

Si Sumayang mibahog og 30 puntos aron pangulohan ang Black Team. 

Ang Sugbo Customs Brokerage naka-ipsot gikan sa mga kamot sa ZAON team sa iskor nga 58-56, samtang ang Red team milampurnas sa Warriors, 67-56. 

Puntos Matag Usa

Dark Green (73) - Emol 19, Domein 16, Dayondon 12, Pareja 10, Navarro 7, Guerrero 5, Vanguardia 4