Radaza II midemolis sa J&C Catering sa ABA caging

CEBU, Philippines - Walay kukaluoy nga gidemolis sa team Radaza II ang J&C Catering, 78-58 sa bag-o lang nasugdan nga Agus Basketball Association (ABA) basketball tournament niadtong Domingo didto sa barangay Agus gym sa dakbayan sa Lapu-Lapu.

Kontrolado sa Radaza II ang kinatibuk-ang duwa ubos sa trayanggulo nilang Gerald Godinez, Bobby Espinosa ug Rene Daño diin miposte kini og singko puntos, 55-50 paghuman sa unang-tulo ka kuwarter. Apan sa final period wala na kapugngi ang pagkiat sa Radaza II, kinsa nagpatuyang lang og panghakot og puntos aron palapdan ang ilang labaw hangtod na sa pagkulit og 20 puntos nga kadaugan.

Si Godinez maoy topscorer sa Radaza II nga milansang og 20 puntos, gisundan ni Espinosa sa iyang 19 puntos ug Daño nga adunay 17 puntos. Ang ilang sinaligang point guard nga si Diego Tampus wala maka-arte og igo lang mi-iskor og siyete puntos.

Ang naparot nga J&C Catering gipangulohan sab nilang Monching ug Raile nga mituhog og 12 puntos matag usa.

Sa pasiunang duwa, ang Antsil/J-Tower milubong sab sa Mansion sa iskor nga 55-40.

Si Melchor Amistad mipabuto og 22 puntos aron pangulohan ang Antsil/J-Tower paglumpag sa Mansion nga gipangulohan sab ni Lloyd Wagwag pinaagi sa iyang 13 puntos.

Ang liga nga gipasiugdahan ni Diego Tampus gipaluyohan sab ni Agus Brgy. Capt. Jovencio Lauron ug Brgy. Councilor Jimboy Igot.

Unang duwa:

ANTSIL/J-TOWER (55) -Amistad M. 22, Tamsi 8, Amistad 7, Daño 5, Qua-ot 4, Tamsi 3, Kenjie 2, Paro 2

MANSION (40) - Wagwag 13, Talu 4, Amistad J. 4, Recello 3, Ogno 2, Amistad 2

Ikaduhang duwa:

RADAZA II (78) - Godinez 20, Espinosa 19, Daño R. 17, Arong 9, Tampus 7, Rodel 2, Serbano 2, Amaya 2, Oyao 1

J&C CATERING (58) - Monching 12, Raile 12, Oyao 9, Asis 6, Gloria 6, Daño 6, Oyao O. 3, Amistad 2, Caping 2. - Yoyo R. Abayan (BANAT NEWS)