Mambaling mirampa sa 1st leg

CEBU, Philippines - Mirampa og maayo ang host Mambaling ug miladlad sa ilang katakus aron dominahon ang kick off leg sa Go Ching Hai and Martina Cup-M.Lhuillier Kwarta Padala Cup Dancesport Competition-Season 2 niadtong weekend.

Ang Mambaling mihakot og tulo ka gold medals, tulo sab ka silvers ug usa ka bronze medal sa open division.

Sila si Chris Dharen Suarez ug Gemma Cabanes mao ang mikabkab og duha ka bulawang medalya sa juvenile standard ug latin class, samtang ang ikatulong bulawan nagagikan sa tandem nila ni Jubert Suico ug Rommelyn Manto sa standard junior division.

Nagsawo sa ikaduhang dapit ang Guadalupe ug Buhisan nga pulos nakakuha og 1-1-1, gold-silver-bronze medals.

Naka-gold ang Guadalupe kortesiya nila ni Patrick Nain ug Tesalonika Bactol human manghawod sa youth standard, samtang sila si Jimmy Jabonero ug Concepcion Gonzaga maoy mitunol og bulawan sa Buhisan human maghari sa latin open class.

Ang Poblacion Pardo naka-gold sab dihang gidominar nilang Jeffrey Ruben Benarao ug Kenia Marto ang junior latin category.

Sa laing bahin, sila si Joshua Cabaras ug Anna Mirafuentes maoy nanghawod sa juvenile standard ug latin divisions, sila si Jubert Suico ug Rommelyn Manto sa junior latin ug standard, samtang sila si Shardie Baydal ug Vaudeville Butanas mao ang kampiyon sa youth standard.

Milangkat usab og titulo ang tandem nilang John Michael Cambayan ug Quisy Chavez dihang ilang gidominar ang latin youth category.

Sa hip-hop contest, gipukan sa Apocalypse ang Jakira Kiyuki sa championship round.

Human sa Mambaling, ang Tejero mao ang sunod nga mo-host alang sa second leg sa maong kompetisyon nga gipasiugdahan sa Dancesports Team Cebu City ugmang adlawa diha sa Tejero Sports Complex. – BANAT NEWS