5 ka PABC boxers midaog

CEBU, Philippines - Miani og lima ka daog ug duha ka pilde ang Philippine-Australian Boxing Club (PABC) sa Summit Natural Drinking Water Fight Night Amateur Series diha sa Gaisano Country Mall sa Banilad, ning siyudad.

Gisugdan sa PABC ang ilang kampanya pinaagi ni Exel Mogar, kinsa midaog batok ni Jerry Sorenio sa Flores Boxing Club (FBC), 3-0 sa 20kgs. division, gisundan sa 2-1 nga kadaugan ni Bebe Rama batok ni Dominique Casañares sa Bacayan Elementary School sa 23kgs. class.

Laing pambato sa PABC nga si Kent Mike Tuñacao miposte sab og daog batok sa laing FBC fighter nga si Archie Sarmiento sa 25kgs. division, samtang si Richard Rama mipukan ni Rammel Casañares sa Banilad sa 25kgs. class.

Si Wenceslao Gakit maoy mitapos sa kampanya sa PABC pinaagi sa RSC (referee-stop-contest) tungod sa injury sa 1:45 sa fourth round sa iyang sangka batok ni Raffy Kubguhan sa Catmon sa 54kgs. division.

Wala hinuon makompleto ang kadaugan sa PABC kay duha sa ilang boksidor ang gipangpilde.

Si Jeffrey Estela napukan ni Melmark Dignos sa FBC sa ilang engkuwentro sa 30kgs. division, samtang si Raymund Fermin napilde sab ngadto ni John Yabut sa Kalibo sa 48kgs. division. - Yoyo R. Abayan (BANAT NEWS)