Jaguars gipanitan sa Lancers

CEBU, Philippines - Wala kapugngi ang higanteng sentro nga si 6-foot-11 Gregory Slaughter ug mipugnit kini og 21 puntos aron pangulohan ang defending champion University of the Visayas (UV) Green Lancers alang sa ilang yano nga kadaugan batok sa University of San Jose-Recoletos (USJ-R) Jaguars, 88-73 sa Game-1 sa ilang "best-of-three" semifinal series sa 9th Cebu Schools Athletic Foundation Inc. (CESAFI) basketball event niadtong Huwebes sa gabii diha sa Cebu Coliseum.

Wala batiag gamay nga kabalaka ang Green Lancers bisan pa sa mga paghulga sa Jaguars, 48-50 kay bisan og gipalingkod   si Slaughter mitubo hinuon og maayo ang ilang labaw human sa ilang 16-5 run aron pagposte sa labing daku nilang bentaha nga 15 puntos sa third period, 66-51.

Misuway na sab unta og sikit ang Jaguars sa fourth period human sa lay-up ni Edmar Pateño, apan ang labing maayo niyang nahimo mao lang ang pagkitkit sa labaw ngadto sa sayes puntos, 64-70 sa nahabiling 6:22 sa duwa.

Human magkabinayloay og posisyon, si Chris Victor Diputado mitusak og triple aron hatagan ang Green Lancers og 84-68 nga labaw sa katapusang 2:24 sa regulasyon.

Mas nahimong sayon ang trabaho ni Slaughter tungod kay giabagan man siya nilang Diputado, Ritchum Dennison ug Phil Mercader nga maoy responsable sa pagpaburot sa labaw sa Green Lancers.

Ang Green Lancers nagkinahanglan og laing daog batok sa Jaguars karong gabii aron moabante ngadto sa championship round diin ilang harungon ang modaog sa duwa tali sa topseed University of Cebu (UC) Webmasters ug sa fourth-seed University of San Carlos (USC) Warriors sa ilang kaugalingong "best-of-three" semifinal series.

Ang Jaguars, kinsa niduwa nga wala ang higante nilang si Abulaiz Suliman tungod sa suspensiyon, gipangulohan ni Edwin Bibera nga mitangag og 26 puntos, gisundan ni Aniceto Lapiz Jr. pinaagi sa iyang 12 puntos.

Ang Green Lancers wala makasugat og problema bisan pa sa pagka-suspenso ni Junjun Lasala.

Sila si Suliman ug Lasala gi-banned sa nahabiling season sa CESAFI dihang wala sila mopatim-aw sa Slam Dunk contest atol sa All Star Games niadtong Domingo.

Puntos Matag Usa

UV (88) - Slaughter 21, Diputado 21, Dennison 9, Silva 7, Mercader 6, Quintana 6, Cabahug 5, Manigque 4, Cincoflores 4, Olivares 2

USJ-R (73) - Bibera 26, Lapiz 12, Pateño 8, Amores 7, Villaver 7, Dela Rama 4, Nudalo 4, Dela Peña 2, Alquizola 2, Duran 1. – BANAT NEWS