dyHP hari gihapon sa KBP caging

CEBU, Philippines - Nadepensahan sa dyHP-RMN Cebu ang titulo isip kampiyon Kapisanan ng mga Brodkaster sa Pilipinas (KBP) basketball tournament nga bag-o lang natapos.

Gidabodabuhan sa mga beteranong batos sa dyHP ang mga batan-ong magduduwa sa dyXR Aksyon Radyo sa finals sa iskor nga 83-79.

Nisutoy dayon ang dyXR sa sayong bahin sa duwa pinaagi sa paglusad og 8-0 run ubos sa giya ni Philip Cerojano, kinsa mipupo og 26 puntos sa maong duwa.

Gumikan niini, si playing coach ug defense specialist Elly Bolonos sa dyHP mitawag og time-out aron mapukaw ang ilang atensiyon sa duwa.

Gipatuman sa dyHP ang ilang hugot nga depensa ug taktika sa ilang opensa hangtod nga nakatabla kini, 20-all paghuman sa unang kuwarter.

Nagpabiling sikit ang duwa sa second quarter ug sa matag puntos sa dyXR tubagon sab sa dyHP sa pagtambayayong nilang  Nestor Homecillo ug Fred Monte. Nahuman ang halftime sa iskor nga 44-42 pabor sa dyHP.

Nahimong kulbahinam ang duwa dihang nilabaw na lang og uno punto ang dyHP sa third quarter, 62-61. Apan pinaagi sa paningkamot nilang Sim Romarate ug Ogie Racaza naangkon sa dyHP ang gipangandoy nga back-to-back championships.

Tulo ka players sa dyHP ang mirehistro og double figures nga gipangulohan ni Homecillo, kinsa miburak og 30 puntos, gisundan ni Monte nga adunay 14 puntos ug Racaza sa iyang 10 puntos.

Sa laing bahin, ang dyMF Bombo Radyo walay puangod nga milubong sa dyRF sa iskor nga 90-60 aron pagsakmit sa ikatulong dapit.

PUNTOS MATAG USA

Unang duwa:

(For third place)

DYMF (90) - Sotto 32, Suico 19, Bernadez 13, Abarri 12, Yap 10, Secuya 4

DYRF (60) - Marañon 25, Lopez 12, Lazaga 11, Guden 8, Mayordo 6

Ikaduhang duwa:

(Championships)

DYHP (83) -Homecillo 30, Monte 14, Racaza 10, Romarate 8, Nuñez 6, Polistico 6, Bolonos 5, Bustamante 2, Quirante 2

DYXR (79) - Cerojano 26, Sabequil 21, Arnibal 16, Jamescarlos 4, Pabiloña 3, Davis 2, Mirafuentes 2, Rosell 2, Odever 1   (BANATNEWS)