Wildcats gipanitan sa Jaguars

CEBU, Philippines - Ang sinaligang point guard nga si Edmar Pateño mibahug og 19 ug unom ka rebounds aron pangulohan ang University of San Jose-Recoletos (USJ-R) Jaguars dihang ilang gipanitan ang Cebu Institute of Technology (CIT) Wildcats, 94-64, sa nagpadayong 9th season sa Cebu Schools Athletic Foundation, Inc. (CESAFI) didto sa Cebu Coliseum.

Nanginit si Pateño dihang nibuhi kini og upat ka triples diin tulo niini gikan sa first half alang sa Jaguars, midugang usab og 14 puntos si Edwin Bibera. Kompiyansa usab si coach Edito Salacut nga mulampos sila sa duwa tungod sa iyang lawum niya nga bench players itandi sa Wildcats ni coach Gilbert Demape.

Sa wala pa siya na-injury, nipusa una og 12 puntos si Marvin Duran, samtang si Midget dela Rama midugang og 10 puntos alang sa Jaguars nga nikolekta og siyam ka triples aron ilubong ang Wildcats.

Tungod sa ilang kadaugan ang Jaguars nisakmit sa ikaduhang luna sa standing, 3-1, win-loss record, samtang ang Wildcats nasugamak sa 1-3 win-loss nga baraha.

Ang rookie nga si Chester Curso mao ang top scorer alang sa Wildcats pinaagi sa iyang 24 puntos, gisundan ni Christian Taboada nga mihungit og 10 puntos.

Sa secondary game, ang University of the Visayas (UV) Baby Lancers miabante ngadto sa number 1 sa standing human nila gipakuratan ang CIT Wildkittens, 90-84, samtang ang USC Baby Warriors milubong og 74 puntos sa CEC Dragons,119-45.

Si Prince Vaught Malana ug Harley Junn Palapar mitira og 18 puntos matag usa, gisundan ni Sherwin Cesar Co nga miburak og 17 puntos ug Genesis Bogo nga mibugha og 16 puntos alang sa Baby Warriors, samtang ang Dragons gipangulohan ni Wes Hao Lin kinsa mao ang bugtong player nga mirehistro og double-figures sa iyang 10 puntos.

Si Gerald Legarde miposte og 22 puntos alang sa Baby Lancers uban ni Vincent Mendoza kinsa midugang og 20 puntos aron masakmit ang 4-0, win-loss nga baraha nag-una sa UC nga nagkupot og 3-0 win-loss card.

Puntos matag usa:

USJ-R (Srs.) 94— Pateño 19, Bibera 14, Duran 12, Dela Rama 10, Dela Peña 8, Soliman 8, Lapiz 8, Nudalo 7, Villaver 6, Pacinoo 2

CIT (Srs.) 64— Curso 24, Taboada 10, Lopez 9, Molero 9, Sagmon 7, Añete 2, Reyes 2, Elmaga 1. – BANAT NEWS