Donaire Milampos paghubo sa bakus ni El Torito

CEBU, Philippines - Gipamatud-an ni Nonito “The Filipino Flash” Donaire nga andam na siyang manghawud sa 115 lbs. division, human sa iyang gipakitang abilidad aron mapukan si Rafael “El Torito” Concepcion sa main event sa “Pinoy Power 2” kagahapon didto sa Hard Rock Hotel and Casino sa Las Vegas, Nevada.

Ang 26-anyos nga si Donaire (22-1) kinsa mibakante sa iyang IBF flyweight title aron musaka sa mas bug-at nga timbang, nipatigababaw batok sa mas bug-at nga si Concepcion (13-4-1) pinaagi sa unanimous decision aron ma-ilog ang WBA interim title.

Tulo ka mga hurado ang ni-iskor og 117-111, 115-113 ug 116-112 pabor ni Donaire.

Si Donaire nigamit sa iyang mga hait nga jab nga maoy nakagisi sa ubos nga bahin sa walang mata ni Concepcion sa tunga-tungang bahin sa second round. Gitapos usab ni Donaire ang third round sa iyang nagpungasi nga mga kinumo nga maoy nakapabarag ni Concepcion.

Ang lumad nga taga-Bohol nga si Donaire kinsa milampos pagdepensa sa iyang flyweight belt sa makatulo ka higayun, desidido karon nga makigharung nila ni Fernando Montiel ug Jorge Arcie kinsa mao ang duha sa mga dagkung pangan sa 115 lbs division.

Sa iyang bahin, daghan usab ang nakugang sa gipakita ni El Torito kinsa nilahutay sa 12 ka rounds nga binukbukay. Ang Panamanian brawler gipahamtangan og penalty tungod kay pakyas kini pagkuha sa timbang.

Sa undercard, nagpabilin sa mga kamot ni Steven Luevano ang iyang WBO superfeatherweight title human gi-disqualify sa referee ang Pinoy nga si Bernabe Concepcion tungod sa pagsumbag niini sa Amerikano bisan pa og nibagting na ang bell sa pagtapos sa round 7.

Ang ALA Boxing fighter nga si Mark Jason Melligen nipadayun usab sa iyang pagpanghasi sa welterweight division human niya gibiktima ang Mehikanong si Ernesto Zepeda.

Si Melligen (16-1, 12 KOs) kinsa nag-train ubos sa giya sa amerikanong si Tony Martin ug ALA chief trainer Edito Villamor, nipatik sa ikaupat niyang sunod-sunod nga kadaugan human niya gipahayang si Zepeda (39-13-4, 34KOs) sa oras nga 2:40 sa round 4. - Lemuel P. Maglinte (BANAT NEWS)