1st Rock and Run pormal nga gilusad

CEBU, Philippines - Usa ka lumba nga puno sa musika ang mahitabo karong Agosto 16 sa pagsikad sa labing unang Rock and Run 2009 “Run for Health” diha sa Cebu International Convention Center (CICC) sa Mandaue City.

Kapin sa 2,000 ka entrante ang gipaabot nga mopakita’g aksiyon sa maong talagsaong lumba.

Usa ka aerobics exercise ang himuon agi’g warm-up sa mga partisipante.

Ang nabantog nga Stagecrew band moduyog aron mopalagsik sa mga partisipante atol sa race proper.

Si Cebu Health and Wellness Council chairman Engr. Oscar Tuason ug Spa and Wellness Association of Cebu president Johnie Lim, nga mitambong sa press conference kagahapon diha sa Cebu Parklane Hotel nagkanayon nga ilang gihimo ang maong kalihukan sa linain nga paagi pag-promote sa medical ug health tourism sa Cebu.

Ang lumba adunay tulo ka kategoriya -- 10K, 5K ug 3K kiddie run.

Ganting salapi ug medalya ang madawat sa top 10 finishers sa maong lumba nga gipasiugdahan sa CHWCI, SWAC, Cebu Provincial Government, Department of Tourism ug gipaluyohan sab sa Parklane International Hotel, M. Lhuillier, Nature’s Spring, Placenta, AXA, Energy FM, Convergys, SunStar, Globe, Julie’s Bakeshop, Monde Nissin Corporation, Tampico, Cebu Dried Mangoes, and

Radical Ads along with Alibyo Boutique Spa, the SPA at Cebu, Grand Royale Spa (BTC), Holiday Gym and Spa, Coach Paquiao Wellness Center ug Langkawi Discovery Spa.

Ang registration fee nagkantidad og P200 libre na ang jersey.

Alang niadtong interesadong mosalmot, mahimong magparehistro sa tanang Body and Sole outlet, The Spa at Cebu, Coach Pacquiao Wellness Center, Langkawi Discovery Spa, Holiday Gym and Spa, DTI, Casa Ilongga, DOT, Alibyo Boutique Spa, Grand Royale Spa, Cebu City Sports Center ug sa Philippine Sports Commission. – BANAT NEWS