25 streetchildren apil sa Fun Run

CEBU, Philippines – Kawhaa'g lima (25) ka bata ubos sa pag-amuma sa Cebu City Task Force for Streetchildren ang mipadayag sa ilang partisipasyon sa Fun Run nga gipasiugdahan sa Metrosports Center ug sa Club Ultima karong Domingo.

Ang nahisgutang lumba himuon sud sa upat ka sunod-sunod nga Domingo sa alas-5:30 sa buntag nga manukad diha sa Metrosports Center sa Lahug ug adto mahuman sa Club Ultima sa Osmeña Boulevard.

Ang bahin sa kita sa Fun Run idonar ngadto sa Cebu City Task Force for Streetchildren nga ubos sa pagdumala ni Cebu City first lady Margot Osmeña.

Gawas sa buffet breakfast diha sa Café Glo nga nag-andam sa tanang mga partisipante sa Fun Run, ang streetchildren itratar sab og usa ka film showing diha sa 4D Theater sa maong edipisyo nga naglatid og 4D movies sama sa Deep Sea Adventure, Dino Rampage ug ang The Lost Island.

Ang individual o corporate group participants gihangyo sa pag-fill up sa registration form. Uban sa registration form mao ang waiver, claim stub nga magsilbeng entry ticket ngadto sa binyu diin ang corporate Buffet Breakfast isilbe ug ang Fun Run t-shirt nga unya ihatag sa adlaw sa lumba.

Upat ka barangay captains ang mihatag sa ilang hugot nga suporta sa maong katuyoan pinaagi sa pagpakatap sa ilang mga tanods.

 Kini mao si Lahug barangay captain Mary Ann de los Santos, Camputhaw barangay captain Lorenzo Basamot, Capitol Site barangay captain Erwin Guazon ug Sta. Cruz barangay captain Jerome Lim.

Moabag sab ang Emergency Rescue Unit Foundation (ERUF) pinaagi sa pagpadala sa ilang First Aid mobile facility sa adlaw sa lumba kortesiya ni Dr. Pek Eng Lim.

Ang Metrosports Fun Run gipaluyohan sab sa The Freeman, Smart, Pagcor, Lipovitan, SunStar-Cebu, Coca-Cola, ABS-CBN, dyAR ug mga individual sponsors kinsa dili magpaila.

Ang registration fee nagkantidad og P350.

Niadtong interesadong mosalmot sa Fun Run, mahimong motawag sa 233-3338. – BANAT NEWS