Match of the Titans sa Hulyo 12

CEBU, Philippines – Ang Southwestern University (SWU) Cobras ug ang University of Cebu (UC) Webmasters nga maoy nag-ilog sa korona sa CESAFI-Partner’s Cup niadtong Marso, magsangka alang sa usa ka exhibition game nga ulohan og "Match of the Titans" karong Hulyo 12 diha sa Cebu Coliseum.

Ang pres-season game sa 9th Cebu Schools Athletic Foundation, Inc. (CESAFI) basketball season, usa ka fund-raising project sa UC College of Law alang sa ilang free legal aid ug bar operations karong Septiyembre didto sa Manila.

Sa dili pa magsangka, adunay preliminary game tali sa UC College of Law ug sa SWU College of Law.

Usa sa labing inilang migradwar nga UC player mao ang presidente sa UC Law Students Society (UCLASS) nga si Kenneth Kern Sesante, ang kanhi skipper sa UC Webmasters.

Si Sesante, anak ni kanhi police general Napoleon Sesante gikan sa lungsod sa Boljoon, maoy second placer sa tibuok nasud atol sa Customs Brokerage Licensure Examinations tulo na ka tuig ang milabay.

Ang maong kalihukan gipasiugdahan ni UC College of Law Dean Atty. Baldomero C. Estenzo, kinsa usa usab ka inilang basketbolista atol sa iyang panahon. – BANAT NEWS