Sinukmagay sa Tabunok

CEBU, Philippines – Andam na ang lima ka boksidor gikan sa siyudad sa Talisay ug laing lima gikan sa Mandaue nga mopakita sa ilang unang away isip pro sa "Bakbakan sa Tabunok Talisay" karong alas-7 sa gabii diha sa Tabunok Sports Complex, Talisay City.

Sa main event, si Fabian Manzano sa Yanie Sta. Cruz Stable makigsangka ni Edison Serrano sa Omega Boxing Stable ubos sa 123 lbs. 

Ang duha ka junior lightweight prospects nag-abot kagahapon atol sa press conference didto sa Golden Gisangag Express sa Andres Abellana st., ning siyudad.

Sa supporting bouts, si Johnrel Rosales sa Omega Boxing Stable mibahad nga iyang pahamtangan sa labing unang kapildihan si Richie Abapo sa Seville Stable, samtang si Ervin Yano moatubang ni Renante Moblefrance sa 105 lbs.

Mopakita usab og aksiyon ang batos ni Nonito Donaire Sr. nga si Juan Purisina sa Guardo Stable nga naglaraw'ng mokulit sa unang daog batok ni Gerson Mercado sa Omega Boxing Stable.

Ang 17-anyos nga si Purisina gihulagway ni Donaire Sr. nga usa ka paspas ug abtik nga boksidor.

Si Sary Canonigo sa Yanie Sta. Cruz Stable moharong batok ni Jason Casimiro sa Omega Boxing Stable.

Mokompleto sa undercard mao ang 12 ka amateur fights nga naglangkob sa mga batang boksidor gikan sa Talisay City Amateur Boxing Association (TACABA).

Ang mga tiket mapalit sa tag P100 alang sa ringside ug P50 sa general admission.

Ang "Bakbakan sa Tabunok Talisay" gipasiugdahan sa Golden Dreams Promotions ni Hon. Resty A. Seville uban sa abag sa Games and Amusement Board (GAB). – BANAT NEWS