7-0 sweep tuyo sa Hotel Fortuna/SWU Cobras

CEBU, Philippines - Walay laing tuyo ang Hotel Fortuna/SWU Cobras kun dili ang pagharos sa pito ka duwa sa elimination round sa dihang ilang sangkaon ang nagsukarap nga Virginia/CIT Wildcats sa pagpadayon sa Cebu School Athletic Foundation, Inc. (CESAFI) Partner’s Cup karong adlawa diha  sa Mandaue City Sports and Cultural Complex.

Mga Duwa Karon (Mandaue Sports Complex)

6:00 pm SWU vs. CIT

7:30 pm USJ-R vs. UC

Sa laing duwa, ang no. 2 qualifier Enervon/UC Webmasters makigtakos batok sa Ave Maria Sanctuary Park/USJ-R Jaguars sa usa ka prestihiyosong duwa.

Modaog man o mapilde dili kini maka-apekto sa Cobras gawas lang og ila gyung paningkamotan ang 7-0 sweep. Tungod kay dili man sab kaayo lig-on ang Wildcats, walay rason nga dili nila maharos ang eliminasyon

Sa laing bahin, ang pagdaog mao sab ang tumong sa Webmasters, kinsa adunay kasaysayan nga mabalhiboan ngadto sa Jaguars sa mga crucial matches sa CESAFI ug kanunay lang masanta pag-abante sa semifinals.

Uban ni 6-foot-9 June Mar Fajardo, kinsa nabalikan sa iyang kahimsog ug si Moncrief Rogado mipamatuod nga siya ang giilang three-point king, daku kining tahas alang sa Jaguars kun unsaon pagpakgang ang opensa sa Webmasters.

Nakapait sa Jaguars kay si Rogado moduwa atubangan sa iyang mga kahigalaan sa barangay Mantuyong nga malakaw lang gikan sa Mandaue Sports Center. Segurado sab nga hugyawan si Rogado sa matag higayon nga mopasulod og 3-pointer.

Sila si Fajardo ug Rogado magkinahanglan sab og suporta gikan nilang Jannsen Abella, Edward Pao ug Kevin Quilantang.

Ang Jaguars magsandig nilang Armand Ponce, Ranulfo Malinao, Jabe Delfino ug Kurt Amores.

Hinuon, bisan pa og unsay dangatan sa duha ka kampo dili kini makatarog sa ilang nahimutangan kay opisyal na silang nahimutang sa tagsa-tagsa nila ka puwesto. – BANAT NEWS