Butuan mo-host sa 63rd NSBC

Cebu - Ang dakbayan sa Butuan sa Agusan del Norte maoy mo-host sa ika-63 nga edisyon sa National Students Basketball Championships (NSBC) nga gikatakda sa Pebrero 23 hangtod sa Marso 2.

Mao kini ang gipahibalo   ni Basketball Association of the Philippines (BAP) regional commissioner Pancho Camingue ug regional director Joseph Gorme ngadto ni BAP-SBP president Prospero 'Butch' Pichay.

Ang Southwestern University (SWU) Cobras maoy kampiyon sa miaging tuig human gipukan ang ilang higpit nga kaatbang University of the Visayas (UV) Green Lancers dinhi sa Sugbu.

Ang tinuig nga kompetisyon gipasiugdahan sa BAP sa kooperasyon sa Federation of School Sports Association of the Philippines (FESSAP) nga ubos na karon sa liderato sa bag-ong napiling presidente Dr. Godofredo E. Gallega sa Technological University of the Philippines.

Ang Benedictine International School gikan sa Quezon City maoy kampiyon sa secondary division dihang ilang gipukan ang Pilgrim Christian College sa Cagayan de Oro City.

Isip ganti ngadto sa SWU ug sa BIS, gidala ni Pichay ang duha ka kampiyon ngadto sa China diin didto niduwa og exhibition games sa Fujian province.

Miuban sab didto sa China sila si BAP Region 7 director Lorenzo 'Chao' Sy, kinsa maoy pangulo sa delegasyon ug SWU athletic director Ryan Aznar.

Ang SWU ug ang UV nakakuha sab og luna sa 6th Asian University Basketball Championship (AUBC) nga dinhi sab gipahigayon sa Sugbu niadtong Hulyo sa miaging tuig. Ang bisitang Hua Qiao University sa China maoy nakampiyon pinaagi sa pagpilde sa UV Lancers.

Ang top two teams karon didto sa Butuan, makaangkon sab og luna alang sa 7th AUBC didto sa Manila. – BANAT NEWS