San Miguel Abante Sa Semis

Cebu - Nagpungasi nga tirada sa gawas ang gibuhi-an sa Sugboanon nga si Dondon Hontiveros kinsa mibugha og 34 puntos aron mahimong bayani sa San Miguel Beer dihang ilang gipalagpot ang Barangay Ginebra Kings kagabii sa Game 3 sa quarterfinals sa iskor, 98-93 aron mo-abante sa semifinal round sa nagpadayon nga KFC-PBA Philippine Cup didto sa Cuneta Astrodome sa Pasay City.

Gitapos sa Beermen ang serye sa 2-1 nga baraha ug maoy makigsangka batok sa naghuwat nga Talk N’ Txt Phone Pals alang sa best-of-seven semifinals sugod karong Miyerkules.

Sa pikas nga bahin, ang modaug sab sa engkwentro tali sa Sta. Lucia Realty batok sa Rain or Shine Elasto Seal maoy makigsangka batok sa Alaska Aces sa laing semifinals diin nag-una ang Realtors, 1-0 sa kasamtangan.

Epektibo kaayong mga tirada sa gawas gikan sa Ginebra maoy hinungdan nganong nabiyaan og 21 puntos ang Beermen sa sayong bahin sa third period, 43-64. Hinuon, gi-apas kini sa Beermen ilabi na kay nanginit sab si giilang “Cebuano Hotshot” nga si Hontiveros kinsa maoy nakapasikit sa iskor ngadto sa 67-70 pagkatapos sa third quarter.

Si Hontiveros sab ang mihatag sa unang labaw sa Beermen, 75-74 pinaagi sa iyang three-point play human sa foul ni Sunday Salvacion sa may 8:43 ang oras sa fourth period. Gikan niadto, nagsige na’g sinukliay og puntos ang duha ka habig ilabi na gyud sa mga tirada gikan sa three-point territory.

Samtang nanginit sila si Hontiveros, Lordy Tugade ug Danny Seigle sa fourth period, nagsige sab og pamuntos sila si Ronald Tubid, Jayjay Helterbrand, Willly Wilson ug Junthy Valenzuela apan hikabsan lang gihapon sila’g bala pag-abot na sa kinatumyan.

Si Hontiveros na maoy nagkontrolar sa duwa sa kataposang tres minutos lakip niini ang upat ka sagunson nga puntos, usa niini solo lay-up nga gikan sa interception ni Tugade. Nakapasulod si Hontiveros og unom sa iyang 11 ka three-point shots alang sa 6-11 three-point field goal.

 Diriyot sab matablahi ni Hontiveros ang iyang career-high 35 puntos nga iyang nakuha sa Game 2 dihang napilde sila sa Gin Kings, 88-91.

Miduyog sa kalipay ni Hontiveros ang iyang trato nga si Valerie Concepcion nga naglayat-layat sa kalipay dili halayo sa bench sa Beermen.

“Taga Cebu kumusta. Happy Fiesta” timbaya pa ni Hontiveros samtang gikahinabi siya sa television.

 Ang rookie guard nga si Bonifacio “Bondon” Custodio mitampo og 14 puntos alang sa maong kadaugan. - Gabby G. Malagar (BANAT NEWS)