Cebu - Ang labing unang kalihukan sa automobiles dinhi sa Cebu ning tuiga mosikad karong adlawa pinaagi sa Cebu Auto and Racing Show (CARS) diha sa Park Mall sa Mandaue City reclamation area.
Ang CARS modagan og upat ka adlaw nga naglatid og upat ka nilaing kompetisyon.
Sugdan ang kompetisyon pinaagi sa car show sud sa mall ug sundan sa sound off.
Hinuon, ang mga organizers nagdumili pagbutyag kun unsa nga matang sa sakyanan ang ipakita sa car show ug gani naghinam-hinam na sab ang mga partisipante.
Ang kompetisyon naglakip sa best in show, paint, interior and engine display, best in stock, best dressed, best European, Japanese, American ug classic.
Sa laing bahin, ang sound off contest adunay two-way ug three-way categories. Ang paghukom magbase sa ilang installation qualities, tones ug measurements.
Ang pre-Sinulog extravaganza gipasiugdahan sa HAIGE Blue Star Marketing. - Yoyo R. Abayan (BANAT NEWS)