SHS Parents ug fya midaug

CEBU – Parehong milampos sa una nilang kumbate ang F. Llamas Youth Association (FYA) ug ang Sacred Heart School Parents Association atol sa pagbukas sa miaging adlaw sa 1st FYA Friendship Cup didto sa Atillo gym sa barangay Punta Princesa, ning dakbayan.

Sa primerong duwa, napasulod ni Carl Rama ang iyang tirada sa three-point area sa nagkaupos na nga segundo aron baswaton ang FYA ngadto sa kulba-hinam nga 88-87 nga kadaugan batok sa Tri J Marketing-Don Bosco.

Kanunay sikit ang duwa sa tibuok second half diin nagsige lang og puli-puli og labaw human makamaneho og 10 puntos nga labaw ang FYA sa halftime, 46-36.

Sa laing duwa, ang Sacred Heart Parents Association midaug batok sa Sherilyn Plastics, 82-76.

Karong gabii, tuyo sa FYA nga makakuha’g 2-0 nga abante dihang ilang ikasangka ang Sherilyn Plastics samtang buot sab sa Sacred Heart Parents nga segunda-an ang ilang daug atol sa ilang pakigsangka batok sa Tri J-Don Bosco.

Ang kanhi UV Lancer nga si Jaymar Canoy nga usa na karon sa sakop sa coaching staff sa SHS-Jesuits SBP Passarelle Division, maoy nangu sa ilang opensa pinaagi pag-iskor og 22 puntos samtang ang iyang kanhi kauban sa team nga si Jaysar Esperat mi-iskor og 15 puntos.

Ang FYA organizer nga si Britt Carlo Reroma kinsa mao na karo’y coach sa San Beda Red Cubs didto sa NCAA, mitampo og 13 puntos alang sa Sacred Heart Parents Association diin siya karon maoy gihimong consultant.

Si Elro Cañete mihakot sab og 22 puntos aron pangulohan ang Sherilyn Plastics samtang sila si Anton Colminares ug John Liway mi-iskor og 12 ug 10 puntos mata’g usa kanila.

Sa sayo pa, si Viking Rollon maoy nangu sa FYA pinaagi sa iyang 23 puntos ug si Daniel Enriquez mi-iskor og 17 puntos. Si Rama kinsa maoy bayani sa maong duwa pinaagi sa iyang winning triple, mi-iskor og 12 puntos alang sa FYA. (Gabby G. Malagar) (BANAT NEWS)