Kadaogan ni Valuev batok Holyfield gi-kwestiyon

CEBU - Daghan ang nakugang sa desisyon sa away tali sa legendary boxing legend Evander Holyfield batok ni Nikolai Valuev atol sa ilang World Boxing Association (WBA) heavyweight bout didto sa Grand Casino sa Baden, Switzerland.

Ang 7-foot nga Russian maoy nigawas nga mananaug sa maong away pinaagi sa usa ka majority decision sa sulod sa 12 ka round. Tulo ka mga hurado ang ni-iskor og 116-112, 115-113, 114-114 pabor ngadto sa Russian kinsa nisaka karon sa rekord nga 50-1, 35KOs.

Sa ilang away, gipakita sa 46-anyos nga si Holyfield nga aduna gihapon siya'y ikabuga dihang gipakuratan niini si Valuev sa iyang atake, nakabawi si Valuev sa tunga-tungang bahin sa away dihang nihinay na ang lihok sa four-time world champion nga si Holyfiled.

“Of course I am disappointed,” matud pa ni Holyfield. “I thought I had done enough to get the win. Now I have to go home and think about my future,” dugang pa niya.

Wala usab gikonpirmar ni Holyfield (42-10-2) kung modayon na ba kini sa iyang retirement. Si Holyfield kinsa napilde usab sa iyang away batok ni Sultan Ibragimov, 14 ka buwan na ang milabay, nipukan sa laing mga banggiitang boksidor nga sila si Lenox Lewis, James Douglas, Riddick Bowe ug Mike Tyson.

Sa iyang bahin, si Valuev nipadayag sa iyang pagdayeg ngadto sa Amerikano human sa ilang away. “He made me work very hard for the win,” matud pa ni Valuev. “Holyfield was unbelievable with his speed. The fight was fought at a great tempo for the whole 12 rounds,” dugang pa sa Russian champion.

Tungod sa maong kadaugan si Valuev moatubang karon sa laing undefeated Russian boxer nga si Ruslan Chagaev sa sunod tuig. (Lemuel P. Maglinte) (BANAT NEWS)