Unhanay Sa Automatic Semis Spot

Cebu - Tulo ka koponan ang mag-ilog karon sa ikaduhang dapit aron masiguro ang automatic semis birth, sa pasiunang duwa ang San Miguel Beermen makigbangga sa Rain or Shine Elasto Painters sa nagkainit nga KFC-PBA Philippine Cup didto sa Araneta Coliseum.

Ang Beermen ug Painters nga pulos nagkupot og 9-7 win-loss nga baraha magdumog karong alas-5:00 sa hapon, aron masakmit ang ikaduhang luna sa standing. Ang duha ka koponan uban sa Talk N’Text Tropang Texters nagsunod sa league-leader Alaska Aces nga nagtangag og 10-6 win-loss nga baraha.

Sa katapusan nilang duwa, napakyas ang Painters sa pagsiguro sa second seed dihang gipakuratan sila sa Tropang Texters sa iskor nga 92-83 niadtong miaging Miyerkules. Apan nibahad si Painters coach Caloy Garcia nga dili na sila masipyat karong higayuna.

Si Garcia magsalig sa duha ka sinaligang rookie nga sila si Gabe Norwood ug Solomon Mercado nga mopakita na usab sa ilang kaidlas aron suphon ang Beermen. Lakip sa mga mubahog sa Painters mao ang beteranong si Rob Wainwright ug ang sentro nga si Jay-R Reyes.

Sa ilang bahin, hugot usab ang tinguha sa Beermen ni coach Siot Tanquincen nga modaog karong adlawa aron mabalik sila sa ilang trono. Ang Beermen nga nag-average og 95.50 points matag duwa pangulohan ni Cebuano Hotshot nga si Dondon Hontiveros, Jay Washington ug rookie Bonbon Custodio.

Samtang sa main game, ang Tropang Texters nga naghupot og susamang standing sa Beermen ug Painters musuway usab paglabni og daog aron makandado ang ilang koponan sa ikaduhang dapit, ang Texters ni coach Chot Reyes musuway pagpaluhod sa Barangay Ginebra Kings sa ilang duwa nga gikatakdang sugdan sa alas-7:00 sa gabii. – BANAT NEWS