Protesta ng Air21 ibinasura ng PBA

Ibinasura ni PBA commissioner Renauld “Sonny” Barrios ang apela ng Air 21 na ireplay ang kanilang kontrobersiyal na laban kung saan natalo ang Express sa San Miguel noong Nobyembre 5.

Ang hatol ay inilatag ni Barrios makalipas ang apat na araw na pag-aaral at pagrerebisa ng protestang inihain ng Air21.

Bagamat inamin ni Barrios na isang seryosong judgment error ang nagawa ng game officials, binigyan diin nitong ang pagkakamali ay hindi naging dahilan sa naging resulta ng laro.

Nagwagi ang Beermen, 130-129 sa double overtime, ngunit pinipilit ng Air21 team officials na iprotesta ito dahil sa unang overtime pa lamang daw ay sila na ang nagwagi.

Angat ang SMB 110-108, tumira ng 3 point si Ranidel de Ocampo may 9.8 segundo na lang ang nalalabi ngunit 2 pts lamang ang ibinilang ni referee Mario Montiel na siyang malapit kay De Ocampo.

“While the error happened with only 9.8 seconds remaining in the first overtime period, the turn of events made the game go into a second overtime period and effectively provided five more minutes for Air21 to recover from the negative effects of the error,” paliwanag ni Barrios.