Pagdumala og bilyaran

Kun ikaw usa ka business-minded ug gusto kang mag-operate og bilyaran, labing maayo nga magbaton ka'g igong ideya kun unsaon pagdumala ang usa ka billiard hall. Kini aron pagseguro nga mo-click ang imong negosyo nga may kalabotan sa sport.

Niay unsolicited nga mga sugyot nga angay ninyong tamdan:

1.Kinahanglan nga ang bilyaran anha ibutang sa dapit nga dali rang maabot sa mga magdudula. Kana bang dapit nga accessible kaayo. Importante kaayo kini aron paghatag og pabor sa mga magdudula nga maggikan sa lain-laing dapit.

2.Bisan estrikto ang pagdumala apan kinahanglan nga mahatagan og comfort ang mga magdudula. Kana bang maka-feel at home sila samtang magdula. Ihatag ngadto kanila ang labing maayong pag-abiabi.

3.Ihatag ngadto sa mga magdudula ang tanang kasayon. Kana bang matubag nimo ang batakan nilang panginahanglan sama sa pagkaon, pansayan ug uban pang importanteng panginahanglan. Mas maayo nga magbaligya ka'g mga pagkaon ug ilimnon. Labing maayo sab nga may comfort room nga magamit ang mga magdudula sa higayon nga motubag sila sa call of nature.

4.Kun makakuha'g sponsors, labing maayo nga magpasiugda og torneyo aron pagdasig sa mga magdudula. Bisan gud dili daku ang premyo. Ang importante mao nga ma-inspired ang mga magdudula. Mao kini ang gihimo sa daghang mga bilyaran sa Sugbu ug sa silingang mga lalawigan.

5.Labing maayo sab nga magpasiugda ka og mga promo ngadto sa mga magdudula. Maghimo'g bisan unsang 'pakulo' aron maikag ang mga bilyarista pagdula sa imong bilyaran.

6.Kinahanglan nga maantigo kang mo-establish og bonding ngadto sa mga magdudula. Importante ang maayong pagpakigrelasyon ngadto nila kay silay magbuhi sa imong negosyo. Kun tukion pag-ayo imo silang mga kustomer. Labing maayo nga ihatag mo ngadto nila ang usa ka old-fashioned customer courtesy nga "customer is always right."

Pipila lang kini sa daghang maayong mga sugyot mahitungod sa pagdumala og bilyaran. Mas maayo usab nga mangayo ka'g ideya gikan sa mga negosyante nga nagmalampuson sa ilang pagdumala sa ilang mga bilyaran.

Isipa nga ang pagdumala og bilyaran, kun ipahimutang sa hustong paagi, gawas nga makasapi ka, makatabang ka usab sa pagpalambo sa abilidad sa mga bilyarista sa imong lokalidad.

* * *

(Mga sugyot ug pakisayod? Text sa 0910-8105522)