Cebu Lite Trading, Unilink Shipping magsangka karon sa kampiyonato

Ang  mas paborito nga Cebu Lite Trading makigharong sa Unilink Shipping alang sa kampiyonato sa 2008 Vic Enterprises Invitational Cup karong buntag diha sa CEC gym sa dalan Dimasalang ning dakbayan.

Ang nahisgutang teams pulos nakakuha'g luna sa finals  niadtong  miaging Domingo human gibuntog ang ilang tagsa-tagsa ka kaatbang.

Gipanitan sa Cebu Lite ang Golden Lines Shipping, samtang ang Unilink naka-ipsot batok sa 100 Plus Isotonic Drink.

Daan nang gilauman nga mo-abante sa finals ang Cebu Lite ni playing coach Boy Te ilabi na sa pagkalagpot sa Ave Maria tungod sa pagpaduwa og dili kuwalipikadong magduduwa, samtang ang Unilink maoy dakung surpresa tungod sa dili sab matupngan nilang paningkamot.

Ang Golden Lines ni commissioner George Uy makigsangka batok sa 100 Plus alang sa ikatulong puwesto.

Sila si Jimbo Noel, Lito Navarro, Inting Reyes ug Elmer dela Cruz maoy gisandigan sa opensa, apan dili sab pabentaha sila si Jared Magdales, Juanito Sasing ug Franco Te, anak ni coach Te.