Cebuano netters nanghawod sa Bacolod

Nanghawod ang mga Sugbuanong netters sa ilang tagsa-tagsa ka mga kategoriya sa pagtak-op sa 4th leg sa Head Penn Tennis Tour kagahapon didto sa Noah Heaven tennis courts sa Montevista, dakbayan sa Bacolod.

Ang pambato sa University of San Jose-Recoletos  (USJ-R) nga si Dan Eldred Sinco nakalingkawas gikan sa kulbahinam nga duwa sud sa tulo ka sets batok ni Ariel Jay Torion sa Pardo, 2-6, 6-4, 11-9 aron paghari sa boys’ 14-under division.

Sa laing bahin, si Franklin Encarcion sa  Dumanjug mao sab ang nanghawod sa boys’ 16-under class pinaagi sa pagpukan ni Cyril Camporedondo sa University of the Visayas (UV) sud sa duha ka sets, 6-4, 6-2.

Sa pikas bahin, si Jessa Mel Singson sa San Carlos City mimakmak ni Abby Gale Amador, 6-2, 6-2 aron pagsakmit sa titulo sa girls’ 12-under category, samtang si Roxanne Alepala sa host-Bacolod milubong sa iyang katagilungsod nga si Isabel Misa, 6-2, 6-0 aron pagdominar sa girls’ 14-under division.

Sa unisex 10-under, si Ryle Singson sa Bacolod mibuntog ni Carl Cathedral, 6-4, 6-2 aron pagsakmit sa titulo.

Ang Tennis Head Penn Tour adto sunod ipahigayon  sa La Paz tennis courts sa Iloilo City karong Abril 18-21.