Bag-ong paagi sa training i-aplay sa 15th Sunsport Training Camp

Bag-ong dagway ug paagi sa training ang isukip sa 15th season sa Sunsport Basketball Training Camp, ang labing taas ug maayong  summer cage clinic dinhi  sa Sugbu nga gikatakdang sugdan karong Marso 31 diha sa New Sacred Heart Center Sports Club duol sa Sacred Heart Church sa dalan D. Jakosalem.

Si Giovannie ‘Jojo’ Romarate, ang training camp director nagkanayon nga 2008 edition sa Sunsport clinic mototok sa depensa sa tinguha nga maugmad og maayo ang mga lihok (movements) ug paniil (footwork) sa mga campers nga seguradong daku’g makatabang kanila sa pakig-atubang sa mga abtik nga mga magduduwa.

Ang registration sugdan sa alas-8:00 sa buntag unya sa Marso 30. Ang entry free alang sa First Level sa usa ka buwan nga clinic nagkantidad og P1,000 libre na ang Sunsport freebies sama sa basketball 2008 model, bag, upper uniform ug white shirt.

Si Andrew G. Choachuy, ang manager sa Sunsport mibutyag nga ila usab nga gawion ug ipaila ang bag-ong  training techniques ug special training tools isip kabahin sa ilang padayong paningkamot sa pagtudlo sa mga campers og scientific methods sa duwa.

“Quality basketball training is what  Sunsport stands for. I assure all those aspiring basketball players that they will get their money’s worth if they enroll at the  Sunsport summer cage clinic,” matud pa ni  Choachuy.

Alang sa dugang mga kasayoran, tawag sa Sunsport Headquarters atol lamang sa oras igtrabaho sa numero 345-1015/16 o call/text 0917-3205769.