2nd MLKP All-Ladies Beach Volley Open andam na

Andam na ang tanan alang sa pagpahigayon sa 2nd M. Lhuillier Kwarta Padala All-Ladies Beach Volley Open karong Domingo sa Wiggy's Beach Resort sa Liloan, Cebu.

Katorse ka teams nga gibahin sa duha ka brackets ang mag-ilog sa korona sa usa ka buwan nga torneyo nga gipasiugdahan sa M. Lhuillier Sports Development Foundation (MLSDF) pinaagi sa paningkamot sa ilang executive director Eddie B. Ybañez.

Ang Southwestern University (SWU) ni coach Janeth Ponte, University of San Jose-Recoletos (USJ-R) ni coach Grace Antigua ug ang University of Southern Philippines Foundation (USPF) ni coach Jordan Paca mopaduwa og duha ka teams.

Mangulo sa mga teams nga mosalmot mao ang defending champion University of the Visayas (UV) ni coach Raffy Briones nga bitoonan gihapon nilang Jusabelle Brillo ug Janez Armie Ygot.

Sila si Brillo ug Ygot  mibuntog  nilang Janelle Tabio ug Marites Natad sa SWU sa final aron paghari sa 1st M. Lhuillier beach volley sa miaging tuig.

Midaog sab sila si Brillo ug Ygot sa mao gihapong kaatbang aron paglangkat sa korona sa  Nestea Beach Volley Season  10 didto sa Boracay Island.

Ning higayona, sila si Tabio ug Natad  moduwa og managlahing kapares. Si Tabio moduwa uban ni Florianne Guttierez ubos sa SWU Team A, samtang si Natad makigpares ni Christine Rose Bohol ubos sa Osaka Iridology.

Ang UV nabutang sa Bracket B uban sa USJ-R Team A  nga bitoonan nilang Michelle Simbajon ug Genie Sabas, USPF-A, Inayagan, SWU-A nga  bitoonan nilang Jessa Salina ug Lori Mae Layno, Abellana National School ug RTM ni Rev. Fr. Rolando R. Manayon.

Sila si Tabio ug Natad maoy mangu sa Bracket A nga naglakip nilang Mechelle Matuguina ug Marissa Lagancian sa Arthro-Heartvit, Jeremie Montalvo ug Kimberly Ybañez sa University of San Carlos (USC), Osaka Iridology, Kenneth Garces ug Sarah Miculob sa MLKP, USPF-B ug Aina 'Popsie' Laroga ug Joy Bonita sa USJ-R Team B.

Ang kompetisyon  moduwa og single round robin sa elimination round diin ang top two teams moabante sa crossover semifinals.  Ang modaog nga mga teams maoy magsangka sa kampiyonato.

Gawas sa mga tropeyo, ang kampiyon modawat og P5,000, ang second placer mobulsa og P3,000 ug ang third placer makadawat  og P2,000.