MLSDF mipasilong sa quarterfinals

Nakab-ot sa MLSDF Selection ang kinatas-ang dapit sa Bracket B human nila  gipukan ang Consolacion National High School (CNHS) sa iskor nga 57-53 aron  sab pag-abante sa quarterfinal round sa 4th M. Lhuillier Kwarta Padala Under-21 Development Basketball League didto sa Consolacion Sports Complex.

Hinuon, ang MLSDF nagkatabla ug ang Salazar Colleges of Science and Institute of Technology (SCSIT) Baby Skyblazers ug sa Cebu Fortune sa Lapu-Lapu City nga  adunay managsamang 6-1 win-loss records, apan ang no. 1 seed gidesisyonan pinaagi sa superior tie-break output gamit ang Olympic quotient system.

Ang MLSDF nakakuha og 1.05 points, gisundan sa SCSIT nga adunay 1.02 ug dayon ang Cebu Fortune nga miposte  lang og .94.

Tungod niini, ang MLSDF nakabaton og twice-to-beat incentives batok sa fourth-ranked Consolacion NHS sa sunod hugna sa torneyo, susama usab sa SCSIT batok sa Cebu Fortune.

Ang MLSDF maoy midonar sa tibuok duwa apan nahulga kini dihang ang Consolacion NHS mikitkit sa labaw ngadto na lang sa usa ka punto 53-54 human  masud ang three-point  shot ni Lemuel Malagar sa nahabiling 29 segundos sa duwa.

Sa sunod nga posisyon, si Mercader nakakuha og foul sa nahabiling 12 segundos sa duwa. Si Mercader mipasud sa iyang unang free throw samtang nasipyat ang ikaduha, apan nasuwertihan sila kay ila nga nailog ang offensive rebound. Ang MLSDF miposa og duha ka free throws nga maoy mitibawas sa oras sa maong duwa.

Sa non-bearing game, ang University of San Carlos (USC) Baby Warriors milubong sa Garing NHS, 72-49.  

PUNTOS MATAG USA

Unang duwa:

MLSDF (57) - Mercader 14, Daan 12, A. Cabahug 10, Cincofloes 6, R. Cabahug 5, Bucayan 4, E. Cabahug 4, C. Cabahug 2

Consolacion (53) - Malagar 17, Linao 9, Ponce 8, Mejares 7, Najarro 6, Jabla 2, Ropal 2, Bacang 2

Ikaduhang duwa:

USC (72)  - Layola 18, Cabang 15, Reyes 9, Acha 8, Ramos 8, Dinsay 7, Cubillan 5, Alforque 2,

Garing (49) - Pardillo 19, Dabon 9, Boncles 6, Alimoren 5, Capangpangan 4, Lupente 2, Mangilaya 2, Lacio 2