UC napukan na gyud

Sa labing unang higayon sa kasaysayan sa Cebu Schools Athletic Foundation, Inc. (CESAFI) athletics event, ang powerhouse nga University of Cebu (UC) Webmaster's tracksters napukan sa University of Southern Philippines Foundation (USPF) Panthers  sa overall medal count sa pagtapos sa tertiary division kagahapon didto sa Cebu City Sports Center (CCSC).

Si Jorge Pinanonang sa UC nidominar sa 400-M, 400-M hurdles ug sa 200-meter event diin miugbok kini og bag-ong rekord nga 22:64 seconds. Iyang nabukan ang rekord ni kanhi Webmaster, RP Team ug SEA Games gold medalist Julius Nerras, kinsa ni-oras og 22:80 niadtong 2002.

Si Love Joy Intong sa University of San Jose-Recoletos (USJ-R) Jaguars mao usab ang nanghawod sa 400M ug iyang natupngan ang rekord ni Lyle Larida niadtong 2002 sa 100M sa oras nga 12:90 ug mitanom og bag-ong rekord sa 200M sa oras nga 26:74 batok sa 26:90 seconds nga nakuha ni Larida   niadtong 2002.

Ang Palaro medalist nga si Harren Melendres sa USPF mibuak sa iyang kaugalingon rekord sa 110M hurdles, 15:19 seconds gikan sa 15:60 seconds sa miaging tuig. Iya usab nga gidominar ang long jump (6:26 meter) ug triple jump (13:33 meter).

Sa laing bahin, si Jefferson Querubin sa USJ-R mibuak sab sa rekord  sa shot put event  nga adunay 11.92 meters gikan sa 11.50 sa miaging tuig.