WBC Convention boxing card naluto na

Ang rematch sa kontrobersiyal nga away tali nilang Jimrex Jaca sa Philippines ug Ryu Miyagi sa Japan maoy main event sa eksplosibong baraha nga  gihikay sa RWS International  sa Sugbuanong promoter Rex 'Wakee' Salud ug MP Promotions ni boxing superstar Manny 'Pacman' Pacquiao   karong Nobiyembre 14 didto sa Mall of Asia carpark.

Usa kini sa mga highlights sa 45h Annual World Boxing Council (WBC) nga gitakda karong Nobiyembre 11-17 didto sa kaulohan.

Atol sa ilang unang engkuwentro duha ka bulan na ang milabay, si Jaca natumba makaduha ka higayon sa  first round, apan nakarekober ug mipakamang ni Miyagi sa himalatyong segundos sa maong hugna.

Hinuon, si Jaca nakaangkon og lawom nga gisi sa iyang nawong nga nakapugos sa ringside physician sa pagmando ni international referee Bruce McTavish sa paghunong sa away sa wala pa sugdi ang ikaduhang hugna. Nakapahimuot, kay si McTavish mideklarar sa away nga "technical draw," kay kuno   headbutt ang nakagisi sa nawong ni Jaca.

"The slo-mo replays confirmed that the cut suffered by Jaca which caused the ring physician to advise McTavish to call a halt in the second round was caused by a legitimate punch and not by a head-butt," pamahayag ni  Ronnie Nathanielsz  sa iyang artikulo sa philboxing usa ka adlaw human sa away.

"Because of the McTavish ruling Jaca retained his title when he didn’t deserve to and despite the polite protestations of Miyagi’s handlers there was nothing that could be done to reverse the decision,"  dugang pa niya.

Sa undercards ning  triple RP championships, si Donie Boy Agrabia modepensa sa iyang RP super featherweight title batok ni Aaron Melgarejo, si Jake Verano modepensa sa iyang RP super bantamweight crown batok ni Jun Talape, samtang si Arniel Tinampay ug Dondon Sultan magtige alang sa bakanteng RP welterweight crown.

Modepensa sab si Balweg Bangoyan sa iyang PBF 122-pound title batok ni Cris Besmanos, samtang si Naozumi Tsuchiyama moladlad sa iyang abilidad sa iyang pakigsangka batok ni William Jorge sa usa ka unom ka hugna nga special attraction.

Lain pang mokatkat ibabaw sa ring mao si Roel Laguna batok Ariel Delgado, Danilo Peña batok Richard Olisa, Ali Cali batok Ronel Ferreras ug Juan Martin 'Bai' Elorde batok Glen Mondol.