Nagtusaktusak 3-point sa Mantawi

Ang Cebu Landmaster-Mantawi mipakaging na usab sa Mindanao Division leader Holcim Pryce Pharma-MisOr, 94-85 sa ML Kwarta Padala Mindanao Visayas Basketball Association (MVBA) Second Conference niadtong Dominggo sa gabii didto sa Liceo de Cagayan Gym sa dakbayan sa Cagayan de Oro.

Nagtusaktusak ang mga tirada nilang Alex Cainglet ug Egay Billones hinungdan nga mipasud sila og kinatibuk-ang 11 ka 3-point shots aron pagtunol sa Cebu Landmasters sa ikaunom nilang sunod-sunod nga kadaugan.

Sila si Cainglet ug Billones milansang og duha ka sunod-sunod nga triple aron paghatag sa Mantawi sa kinadak-an nilang labaw nga 23 puntos, 81-58, sa sayong bahin sa katapusang kuwarter.

Hinuon niaksiyon og takilid ang Mantawi ug pinaagi nilang Gilbert Demape ug Bob Cozy Ilanga, ang MisOr mi-rally hinungdan nga nihiyos ang dakung labaw ngadto na lang sa 88-83 sa nahabiling 1:32 sa duwa.

Apan dali nga mitubag si Cainglet pinaagi sa pagtusak-tusak og duha ka 3-pointer aron pagpabalik sa labaw sa Mantawi ngadto sa 94-83.

Si Cainglet mipasud og walo ka three-point shots aron pagposte og 29 puntos, samtang si Billones mitampo og 23 puntos alang sa Mantawi nga nagbitbit na karon og 7-2 win-loss record.

Si Demape maoy nangu sa MisOr bitbit ang 26 puntos, gisundan kini ni Ilanga nga adunay 13 puntos. Bisan pa man sa ilang kaparotan, ang MisOr mao gihapon ang moguwang top seed sa Mindanao Division bitbit ang ang 6-4 win-loss record.