Rehistrasyon para MM Milo Marathons simula na

Magsisimula na ngayon ang rehistrasyon para sa 26th edisyon ng Metro Manila Milo Marathon elimination na papalo sa Hulyo 28 sa Quirino Grandstand sa Vasquez Madrigal Plaza Bldg., 51 Annapolis St. sa Greenhills San Juan. Ang patalaan ay tatagal ng hanggang Hulyo 20.

Ang mga events na paglalabanan ay ang 3K run para sa kabataan na may edad 6-12, 5K at 10K run para sa 13-years pataas at ang 42K qualifying run para sa may gulang 18-pataas.

Ang registration fees ay P30 para sa 3K run, P50 sa 5K run, P80 sa 10K run at P150 sa 42K qualifying run.

Ang karera ngayong taon ay hatid ng Department of Tourism, Bayview Park Hotel, Adidas at Ford na layuning makahakot ng atensiyon ng mahigit sa P50,000 runners nationwide. Mahigit sa 30,000 runners ang lumahok noong nakaraang taon kung saan sina Allan Ballester at Cristabel Martes ng national training pool ang parehong nagwagi sa kani-kanilang division.

Inihayag rin ni Milo national race organizer Rudy Biscocho na ang patalaan para sa inagurasyon na karera sa Davao ay sa July 7 ay kasalukuyan ng ginaganap sa PTA Sports Complex sa Jose Camus St. sa Davao City.