Archival nipirma og MOA alang sa Marter’s ug Doctoral Scholarship Program

CEBU, Philippines — Gipirmahan ni Cebu City Mayor Nestor Archival, Sr. ang memorandum of agreement (MOA) alang sa pagpatuman sa Master's and Doctoral Degrees Scholarship Program dinhi sa siyudad.

Ang maong programa usa ka inisyatibo nga nagtumong sa pagpalambo sa kalidad sa edukasyon pinaagi sa paghatag og mas daghang oportunidad sa graduate studies aron  molambo ang propesyon sa mga magtutudlo ug mga school head.

Ang maong kasabotan usa kini ka hiniusa nga programa ubos sa Cebu City College Scholarship Program, Department of Education (DepEd) Schools Division of Cebu City ug mga kaubang higher education institutions aron mapadali ang pag-access sa mga magtutudlo ug school leaders sa advanced education ug professional development.

Uban ni Archival sa pinirmahay sa MOA si DepEd Cebu City Schools Division Superintendent Dr. Nimfa Bongo, opisyales sa Cebu City College Scholarship Program ug mga representante gikan sa nagkadaiyang unibersidad sa siyudad nga gilangkuban sa Cebu Institute of Technology-University (CIT-U), University of Southern Philippines Foundation (USPF), University of the Visayas (UV), University of Cebu (UC) ug Cebu Technological University (CTU).

Gipadayag ni Archival nga ang pagpamuhonan sa mga magtutudlo maoy usa sa mga mahinungdanong lakang aron mapalambo ang kalidad sa edukasyon sa siyudad.

Alang kang Archival nga ang pag-atiman sa mga magtutudlo sama lang nga nag-atiman sa kaugmaon sa matag estudyante ug sa sunod nga henerasyon sa mga Sugboanon. BDB BANAT NEWS