NLEX mitumba sa SMB, 4-0 na

CEBU, Philippines — Si coach Jimmy Alapag ug ang NLEX Road Warriors mipatigbabaw batok sa San Miguel Beer, 110-96, sa usa ka sangka tali sa way pilding mga koponan sa PBA Season 50 Governors Cup niadtong Domingo, Hulyo 26, didto sa Smart Araneta Coliseum.

Ang import nga si DeQuan Jones miharos og 27 puntos ug 10 ka rebounds, samtang sila si Schonny Winston ug Robert Bolick dako sab og naambag sa dihang gangkon sa NLEX ang solong liderato sa Group A uban ang perpektong 4-0 nga baraha.

Si Winston mikadlit og 24 puntos samtang si Bolick midugang og 14 puntos ug 12 ka assists sa dihang gitabla sa NLEX ang rekord alang sa labing nindot nga sinugdanan sa ilang prangkisa.

Ang Beermen nakasikit ngadto sa otso puntos, 82-90, human sila malubong og 25 puntos, 60-85.

Apan si Bolick milansang og krusyal nga 4-pointer ug dayon mipasa og upat ka mahinungdanong assists ngadto nilang Jones, Robert Herndon, ug Anthony Semerad aron paburoton og balik ang labaw sa NLEX ngadto sa 17 puntos, 110-93, sa pinal nga 1:10 sa duwa.

Si Semerad mitapos uban ang 15 puntos, tanan mga 3-pointers, samtang si Herndon miamot og 12 puntos alang sa Road Warriors.

Si George King mipabuto og 31 puntos samtang si Don Trollano mibubo og 11 sa iyang 16 puntos sa katapusang kuwarter apan nakawang ang ilang paningkamot kay naputuol ang tulo ka sunod-sunod nga daog sa Beermen.

Ang Sugbuanong bitoon sa SMB nga si June Mar Fajardo miposte sab og 16 puntos sa wala pa nagtakiang nga migawas sa korte sa katapusang 68 segundos.