Bida sa impeachment
Hinaut nga nakaamgo na ang senator judges sa duha ka dagkong problema sa impeachment trial ni Bise Presidente Sara Duterte: Paukyab sa prosekusyon ug depensa pinaagi sa balik-balik nga mga pangutana, walay kinutoban nga objections ug wala kinahanglana nga mga lalis dili aron pagpalig-on sa kaso kon dili aron pagmatuod kinsay mas kamao (ug, sa bahin sa depensa, pag-ulog-ulog sa kliyente); ug
Pabadlong sa pipila ka senator judges (duha nila magsuon) pinaagi sa tulibagbag nga manifestations (walay labot sa husay) ug mga pangutanang pabor sa ilang gipustahan.
Unsaon man nila pagpaspas ang proseso nga dili kahikawan ang prosekusyon sa pagpresentar sa ilang mga testigo ug mga ebidensiya ug dili kahikawan si VP Sara sa katungod pagpanalipod sa iyang kaugalingon?
Kon natarung pa lang ang pretrial conference, nauyonan na unta sa prosekusyon ug depensa (ug kon wala sila magkauyon, natakda na unta sa senator judges) nga labing importante rang mga saksi ug mga ebidensiya ang i-presentar ug ang mga isyu nga dili na kinahanglang lalisan (sama sa katinuod sa video sa online press conference ni VP Sara).
Tinuod nga angayng gamiton ang mga lagda sa korte. Aron paghapsay sa proseso. Dili paggapos sa husay sa walay kinutoban nga technicalities. Nga masaag na hinuon sa tinuod nga tuyo nga mao ang pagpakita ug pagtuki unsa kalig-on ang mga ebidensiya. Angayng timan-an sa senator judges, ug sa kampo ni VP Sara, nga dili sila ang bida sa husay. Kon dili ang katawhang Pilipinhon. Nga maoy nagbayad sa minilyon ka pesos nga gasto sa kada husay. Gawas nga maoy tag-iya sa buhis nga giingon nga gibolsa sa sinumbong.
Kon manghuy-ab nang publiko, mawad-an og interes sa pagsubay sa husay, mohunong sa pagsuway pagsabot sa proseso, mawad-an sila og pagsalig bisan unsa pay desisyon nga makab-ot, pagkobikto o pag-absuwelto man ni VP Sara. Sayop ang pagtuo nga si VP Sara maka-benepisyo sa paglangay sa husay. Bisan ma-absuwelto mahimong makumbinser ang publiko nga kawatan siyang dako ug silotan sa 2028. Bantay sang senator judges nga mosalida pagpalambo sa ilang politikanhong mga ambisyon. Mas bug-at nga silot ang mapaabot sa mga mo-sabotahe sa labing taas nga proseso sa p
- Latest
