Baha ng korapsyon

HINDI lang ulan ang bumabagsak ngayon. Pati galit ng taong matagal nang niloloko. Sa bawat kalsadang nilulunod ng baha sa Metro Manila at karatig-probinsiya, may tanong na hindi kayang takpan ng press release. Nasaan ang bilyun-bilyong pondong dapat sana’y panangga sa ganitong delubyo?

Taun-taon may budget. Taun-taon may proyekto. Taun-taon may seremonya, ribbon-cutting at matatamis na pangako. Pero pagdating ng malakas na ulan, balik tayo sa parehong eksena bahay na lubog, negosyo na wasak, pasahero na stranded at mga pamilyang kinakabahang baka tangayin ang kanilang pinaghirapan.

Kung may mga pondong inilaan para sa flood control na ninakaw, sinayang o pinagsabwatan ng mga tiwaling opisyal at ganid na kontratista, hindi ulan ang dapat sisihin.

Sabi nga, sila! Mga kurap ang dapat managot.

Hindi kasalanan ng ordinaryong Pilipino na kulang ang flood-control system. Hindi niya ninakaw ang budget. Hindi siya ang pumirma sa kontrata. Hindi siya ang nag-apruba ng proyektong palpak. Pero siya ang nagbabayad at siya rin ang unang nalulunod.

Kaya sa mga nagkutsabahan para pagkakitaan ang kaban ng bayan, huwag ninyong isipin na pera lang ang nawala. Buhay, kabuhayan at kinabukasan ng mga Pilipino ang isi­nugal ninyo.

Bawat pisong kinurakot ay maaaring katumbas ng kanal na hindi naayos, pumping station na hindi gumana, estero na hindi nalinis, o proyektong hindi natapos. Kaya kapag umapaw ang tubig, huwag tayong sabihan na “natural disaster” lang.

May kalikasan ngang naniningil, pero may mga taong matagal nang nangungurakot. At kung may opisyal na ka­sab­wat, contractor na nakinabang, middleman na kumubra at sinumang tumulong magtago ng katotohanan huwag silang hayaang malunod sa pera habang ang taumbayan ang nalulunod sa baha.

Panagutin ang may sala. Ibalik ang ninakaw kung mapapatunayang ninakaw. At higit sa lahat, itigil ang pagtrato sa kaban ng bayan na parang personal na alkansiya.

Dahil ang tubig ay humuhupa. Pero ang galit ng taong ilang ulit nang nilunod ng korapsyon hindi ganoon kadaling patuyuin.

Disclaimer: Komentaryo at pananaw ng manunulat ang artikulong ito. Ang anumang alegasyon ng korapsyon, pag­nanakaw o pakikipagsabwatan ay nangangailangan ng sapat na ebidensiya at kaukulang imbestigasyon at proseso ng batas. Hindi nito itinuturing na nagkasala ang sinumang partikular na tao nang walang pinal na legal na hatol.