Kini maoy nindot

Nindot kaayo ang tinguha ni Cebu City Councilor Alvin Arcilla nga undangon na ang sayop nga paagi sa pag-aspalto sa atong mga karsada nga ideritso ra pagsapaw ang bag-ong aspalto.

Resulta, ang arcaded sidewalk nga kaniadto mas habog og gamay kay sa karsada, karon anaa na sa ubos. Kon mag-uwan karon, ang tubig gikan sa karsada maglunop ug modagayday na sa aseras.

Mao kini ang rason nga dinhi sa Cebu City ang atong mga aseras maglakang-lakang ka kay gibutangan man og mga “barriers” sa mga tag-iya sa building aron nga kon mag-uwan dili mosulod kanila ang tubig.

Dili gyud unta kini angay tungod kay makabalda kini sa pag-agi sa mga Persons with Disability (PWD), apan unsaon man, pakyas man ang atong mga opisyal sa kagamhanan paghimo kon unsay husto.

Pagkakaron, diha sa Colon Street, ug sa uban pa nga mga karsada sa Cebu City, dili “PWD friendly” ang atong sidewalks. Sa ubang modernong kanasuran, kuhaon gyud nila usa ang karaang mga aspalto, usan kini butangan og bag-o.

Mao kini ang gusto ni Konsehal Arcilla nga ipatuman na gyud ang hustong pamaagi, kay kon padayonon ang sayop nga sistema, moabot ang higayon nga maghangad na ta sa karsada kon naa ka sa sidewalks.

Nahukman ni Konsehal Arcilla nga himoan og ordinansa nga kinahanglan nga kon mag-aspalto gani sa karsada, i-scraped gyud, tangtangon ang daan nga aspalto.

Diha sa Colon kon kubkubon ang nagtipun-og na nga mga aspalto, unya ibalik ang karaan nga level sa karsada, tingali mga upat ka dangaw ang gihabogon sa angay’ng tangtangon.

Apan angay kini nga himoan usa og pagtoon kay mimabaw na baya sab ang atong kasapaan. Nagpasabot nga kon paubsan ang atong mga karsada, basin og mahimo na unya kini nga linaw.

Daghan kaayong mga engineers nga nahimong mga opisyal sa siyudad, apan wa sila makahunahuna niini. Ang uban magpatuo nga ngilngig kaayo sila, apan wa nila kini mahimo atol sa ilang pagpangatungdanan.

Gihisgotan nako kining maong isyu sa makadaghan na nga higayon, apan kay dili man lagi ta engineer ug dili ta opisyal, dili sila mamati sa atong sugyot.

Usa ka kanhi city engineer maoy mitug-an nako nga dakong sayop ang gihimo sa siyudad sa nanglabay na nga mga pamunoan, kay ang aspalto angay gyud unta nga kuhaon.

Unya, tan-awon kon mahimo pa ba kini nga lutoon pagbalik sa atong batching plant. Kon mananglit mahimo pa kini, nagpasabot nga daghan pa nga mga karsada nga mapanindot nato.