SONA

Moatubang na usab karong hapon sa katawhang Pilipino si Presidente Ferdinand Marcos Jr. sa iyang ikalimang State of the Nation Address (SONA) didto sa hawanan sa Kongreso.

Gilauman nga ipresentar sa Presidente ang estado sa ekonomiya, kalamboan sa imprastruktura, ug mga programa sa social services sa nasud ubos sa iyang administrasyon.

Daghang nag-atang nga hatagan og prayoridad sa Presidente sa iyang SONA ang food security ug energy supply sa Pilipinas, ilabina ning panahon sa pag-ulbo sa mga dagkong kaguliyang sa kalibotan.

Usa sa gipaabot sa katawhan nga tukion sa Presidente mao ang isyu sa West Philippine Sea diin miinit karon ang tensiyon tali sa Pilipinas ug China. Usa kini ka sensitibo nga isyu ug ang publiko gusto maminaw kon unsaon paglatid ni Marcos pagpanalipod sa interes sa nasud.

Angay usab nga maapil sa diskusyon sa SONA ang seryosong kontrobersiya sa flood control projects. Ang mga alegasyon sa overpricing ug kakulang sa transparency nag-aghat sa katawhan pagpangayo og klaro nga tubag gikan sa Malacañang.

Gilauman usab sa katawhan nga ang administrasyon moyagyag sa update sa Build Better More Program sa gobiyerno. Ang mga proyekto sa kalsada, tulay, ug transportasyon gikinahanglan aron mapalambo pa ang mga rehiyon.

Ang mga sektor sa edukasyon ug kahimsog sa katawhan kinahanglang dili usab kalimtan. Atong gilauman nga ang mga reporma sa curriculum sa edukasyon ug ang pagpalig-on sa public health system angay unahon usab sa pag-implementar.

Ang SONA usa ka oportunidad alang sa Presidente pagpakita sa tinud-anay nga direksyon sa nasud kabahin sa West Philippine Sea, flood control projects, ug uban pang isyu nga seryosong makaapektar sa mga Pilipino.