EDITORYAL - Kurapsyon hisgutan sa SONA

Sa ikalimang State of the Nation Address (SONA) ni Presidente Ferdinand Marcos Jr. karong Lunes, Hulyo 27, unsa kahay iyang iestorya atubangan sa kapin 100 milyones nga Pilipino bahin sa iyang pamunoan?

Pero sa gihimong survey sa Pulse Asia sa niaging bulan ug gipagawas kagahapon, Hulyo 24, mayoriya sa mga 2,400 ka mga hamtong nga Pilipino ang nitubag nga mas gusto nilang madungog gikan sa presidente sa iyang SONA ang kabahin sa solusyon batok sa kurapsyon ug ang pagpanubag sa mga kurakot.

Moabot og 29.8 porsiyento sa mga napangutana ang niingon nga gusto nilang tukion sa presidente ang maong isyu. Ang uban, nagkalain-laing isyu ang gustong pahisgutan kang PBBM gikan sa isyu sa suholan, presyo sa lana, agrikultura, trabaho ug panginabuhian ug impeachment ni VP Sara Duterte.

Tingali sa kadaghan sa problemang giatubang sa nasud karon ug napul-an na ang mga tawo aning kahasol dala sa mga pagbaha nga nakaguba na og daghang kabtangan, mga imprastraktura, ug nikalas og daghang kinabuhi.

Kung mahinumdoman, karong Hulyo 27 maoy sumad sa pagwadwad ni PBBM bahin sa kurapsyon diha sa flood control projects diin bilyones ka pesos ang nawala ug napunta lang sa bulsa sa mga kurakot nga mga opisyales sa gobiyerno, mga pribadong kontraktor ug uban pa.

Atol sa iyang ika-upat nga SONA sa miaging tuig, namahayag ang presidente og “Mahiya naman kayo” nga ang gipasabot mao ang mga tawong nalambigit sa pagpangawat sa pundo sa gobiyerno para sa mga flood control projects.

Gipasubay niya ug gipaimbestigahan ang tanang proyektong pang imprastraktura sa gobiyerno sulod sa nakalabay nga napulo ka tuig, apil ana ang unang tulo niya ka tuig sa pagka-presidente sa nasud.

Nasuta nga dunay mga proyekto nga substandard ang pagkahimo, naay mga proyekto nga gitukod sa mga lugar nga wala kinahanglana tukoran, naay mga proyektong wala gyud mabuhat apan ang pundo nahurot na og bayad o nakuha na tanan sa mga kontraktor. Pipila sab ka mga opisyales sa DPWH na ang gipangimbestigar ug gipangpriso kauban sa pipila ka mga private contractors ug duna nasay mga akusadong opisyales nga niuli sa kwartang matud pa ilang nakawkaw gikan sa maong mga flood control projects.