Bugalbugal sa impeachment
Ang impeachment trial ni Bise Presidente Sara Duterte nahimong salida sa walay kinutoban nga mga binuang. Daghang salamat sa kakiat sa iyang mga abogado. Walay direksiyon ang ilang objections ug cross examination, bahala na kon napalig-on nila ang mga ebidensiya sa prosekusyon ug naunay pagbuslot ang depensa sa ilang kliyente.
Unsa man diay ang motibo sa ilang salida? Mas maayong pangutana: Kinsa may gipahinungdan sa ilang mga paukyab?
* * *
Ang kasaag sa ilang objections ug mga pangutana karibalan lang sa ka-walay kapuslanan sa ilang mga panginsulto sa prosecutors ug mga testigo. Wala kaikyas sa ilang panaway ang mga abogado ug abogada nga wala kapasar sa unang pagkuha sa bar examination ug ubos sa 80% ang grado.
Gusto ba lang silang molangay ug molawgaw sa proseso? Gusto ba lang molibog sa senator judges ug mopawong sa interes sa publiko? O desperadong naningkamot pagtagbaw sa ilang kliyente nga wala mabantog sa kalawom kon dili gikaintapan sa kamabaw sa mga istorya, maghisgot og mas daghang dugo mas maayo.
* * *
Posible hinuon nga wala sila magtagad sa kalidad sa ilang mga argumento. Wala gani tingali magpakabana sa direkta nga pagtubag sa mga ebidensiya sa pagpangawat, pagsuburno, pagtago og binilyon ka pesos sa iyang bank accounts ug paghulga sa iyang mga kaatbang.
Tingali gipasaligan sa ilang mga numero. Nga bisan unsa pa kalig-on ang mga dokumento ug mga testimoniya nga mapresentar batok ni VP Sara atol sa nagpadayong husay, walay 16 ka boto nga mo-konbikto niya. Kon nakaseguro na sa iyang mga alyado sa Senado, nganong maghago pa man sa paghimo og tinarung nga depensa?
* * *
Kasagaran, kon dili man tanan, nga mga ebidensiya batok ni VP Sara gikan sa iyang kaugalingong baba ug buhat. Ang sobrang garbo ug bilib sa kaugalingon maoy nakapahagsa sa daghang mga dinastiya (sa walay paghisgot nga maoy nakapa-priso ug posibleng makapa-konbikto sa iyang kaugalingong amahan sa International Criminal Court).
Pinaagi sa pagbugal-bugal sa institusyon nga gisugo sa konstitusyon sa paghimo sa impeachment trial, gipakauwawan nila ang mas taas nga korte. Ang opinyon sa publiko ug ang kasaysayan maoy mga huwes nga dili malipat ug dili mahulga. Ug maoy mopahamtang sa labing makiangayong silot.
* * *
- Latest
