Mga aral sa impeachment trial

Sa bawat araw ng impeachment trial laban kay Vice President Sara Duterte, hindi lang mga senador at kongresista ang natututo kundi pati ang sambayanang Pilipino. Ang mga eksena sa Senado ay nagsisilbing salamin ng ating lipunan, at mula rito ay may ilang mahahalagang aral na dapat baunin ng taumbayan.

Nakita ng mga Pilipino na ang batas ay dapat pantay-pantay. Kapag ang ordinaryong tao ay napaparusahan sa bomb joke o maliit na pagnanakaw, dapat ding may pananagutan ang mataas na opisyal na nagbibitiw ng mabibigat na salita o banta. Ang trial ay nagbukas ng diskurso tungkol sa “double standard” sa hustisya. Natutunan ng taumbayan na ang kapangyarihan ay may kaakibat na responsibilidad. Ang pagiging ikalawang pinakamataas na opisyal ng bansa ay hindi lisensya para makaligtas sa pananagutan. Ang impeachment ay paalala na kahit sino, gaano man kataas ang posisyon, ay maaaring managot.

Ang proseso ng impeachment ay nagpapakita ng lakas ng ating demokrasya. Bagama’t puno ng drama at politika, ito’y patunay na may mekanismo ang bansa para suriin at pigilan ang inaakalang pang-aabuso ng ka­pangyarihan. Ang mga mamamayan ay natututo kung paano gumagana ang checks and balances. Isa ring aral ang kahalagahan ng tiwala. Kapag ang lider ay na­sa­sangkot sa banta o kontrobersya, ang tiwala ng taumbayan ay mabilis na nauupos. Ang impeachment trial ay nagsisilbing babala na ang kredibilidad ay mas mahalaga kaysa sa titulo.

Ang impeachment trial ni VP Sara ay hindi lamang laban ng mga politiko. Ito’y magiging aral para sa bawat Pilipino na ang hustisya ay dapat pantay, ang kapangyarihan ay may pananagutan, at ang demokrasya ay buhay kapag ang taumbayan ay mulat. Pinakamahalaga ring matutunan na ang gobyerno ay para sa tao, at hindi para sa iilan.