Bakak

Sa binugoy pa nga sinultihan, “nahu’g sa taru” ni Cebu City Mayor Nestor Archival ang mga vendors sa Carbon Market kay iyang napatuo nga suportado siya nga dili madayon pagpatuman ang Joint Venture Agreement (JVA) sa pag-privatize sa merkado sa Carbon kon siya na ang mayor.

Tuod, dihang gihimo na ang eleksiyon pagka mayor sa Cebu City, ang kaliboan ka vendors ug ilang mga pamilya didto gyud misuporta kang Archival tungod sa iyang pasalig.

Apan karon, nahiubos pag-ayo ang mga vendors kay nasabot nila nga ang mayor tua na midapig sa Megawide Construction Corporation nnga maoy gitugyanan sa Cebu City government sa pag-modernize sa Carbon Market.

Kon hingpit na nga ang Megawide maoy modumala sa pagpangolekta og abangan sa mga stalls sa Carbon Market, nalantawan na daan sa mga vendors nga momahal pag-ayo ang ilang bayranan sa pagpaninda diha sa merkado sa siyudad.

Pun-an pa sa kaliboan ka lumolupyo sa Sitio Bato, Barangay Ermita nga nangyamiid na kang Archival tungod kay nasabtan nila nga tua na kini midapig sa Megawide.

Para nako, salawayon gyud tuod ang gihimo ni Archival nga dihang konsehal pa siya ug atol sa pagpangampanya niya dihang milansar siya pagka mayor sa siyudad, gipasalig gyud niya sa mga vendors nga suportahan niya ang ilang kawsa nga dili madayon ang JVA.

Karon gibaliwala na ni Archival ang iyang pasalig ngadto sa mga vendors ug mga lumolupyo sa Sitio Bato, Ermita. Butang nga gikasagmuyo pag-ayo sa mga hingtungdan.

Si Erwin Gok-ong nga founder ug karon general manager sa Cebu Market Vendors Multi-Purpose Cooperative (CEMVEDCO) nahiubos kaayo kang Archival, nga gihulagway niyang tua na midapit sa Megawide.

Aw, kon ingon niini ang batasan ni Archival, imposible nga anha gihapon kaniya mosuporta ang mga vendors nga kaniadto mibotar gyud kaniya tungod sa iyang pasalig nga nahimong bakak.

* * *

Utokan man unta si Mayor Archival, apan naglibog ko nganong maklaro na man nga gitalikdan na niya ang iyang pasalig ngadto sa mga vendors sa suportahan sila sa ilang kawsa.

Dili ikalimod nga ang JVA nga gipirmahan sa mga opisyal sa Cebu City ug sa kadagkoan sa Megawide, usa ka “disadvantageous contract” ngadto sa kagamhanan sa Cebu City. Ang Project Oversight Committee nga maoy maisip nga policy making body sa pagdumala sa Carbon Market, gilangkoban sa pito ka sakop ug tulo ra niini ang representante sa siyudad, upat gikan sa Megawide.

Pananglit magkinahanglan og botasyon aron pagkab-ot og hukomklaro kaayo nga ang molusot mao ang gusto sa Megawide ug igo lang mangutkot sa pahak ang mga representante sa siyudad.

Daghan pa nga lagda diha sa JVA nga alkanse ang siyudad.