Unang mihubas ang budget

Misaad si kanhi DPWH Undersecretary Roberto Bernardo nga i-uli niya ang mokabat P1 bilyon ngadto sa kagamhanan isip kabahin sa iyang tulomanon aron madawat siya sa Witness Protection Program.  Gisayon-sayon man lang ni Usec Bernardo ang pag-uli sa maong kantindad.  Makapangutana na lang kita kon unsa diay kaha ka dako sa nasakiyo niining mga tawhana gikan sa gobyerno?  Matud pa sa usa ka netizen, “Mao diay’ng pakyas ang atong mga flood control projects kay una pa man’g mihubas ang budget kay sa bahâ.”  Fezteleern!

Ma-maintain ang blood sugar

Namahayag ang Philippine Sugar Millers Association (PSMA) nga adunay igo’ng suplay sa asukal alang sa panginahanglan sa mga konsumidor bisan sa padayon nga kagubot sa Middle East.  Bisan pa sa kaabunda sa suplay, dili gihapon nato maseguro nga dili mosaka ang presyo sa asukal kay apektado man ang presyo sa mga farm inputs.  Sa laing bahin, matud pa sa akong amigo, “Ni’ng pamahayag sa PSMA, makasalig hinoon ang mga diabetic nga aduna silay padayon nga suplay aron ma-maintain ang ilang taas nga blood sugar.” Saoonz!

Kuyanap ang pagpangawat

Giisip sa PNP nga usa lang ka isolated case ang nahitabo sa usa ka gasoline station diin adunay customer nga nagpatubil og gasolina apan mikalit pagsibat aron dilin kini makabayad. Posible nga isolated case lang ang nahitabo kay kuli man kita makadungog ni’ng maong matang sa balita.  Apan matud pa sa akong pilosopo nga amigo, “Mahimo’ng isolated ang maong kaso sa “gas and run” incident, apan dili isolated ang kasong pagpangawat kay daghan ug kuyanap man kini dili lang sa mga kabos nga katawhan kon dili lakip na sa mga opisyal sa kagamhanan.”  Muleeng!

Ibayad sa pre-natal?

Nadakpan sa kapolisan ang usa ka 18-anyos nga mabdos nga babaye sa aktong pagpangawat og mga mga beauty products sulod sa usa ka mall sa dakbayan sa Sugbo. Ipamaligya usab unta kuno sa dinakpan ang iyang mga kinawat ug ang halin iyang ibayad sa pagpapre-natal.  Mora’g mabaw ra man ang rason kay aduna ma’y libre nga pre-natal sa mga barangay health centers.  Nagpaluoyluoy na kay nadakpan na man. Komento pa sa akong silingan, “Puslan man’g nangawat, nanag-ing unta siya sa mga politiko nga dagko’ng kantidad ang kawaton, inay mga beauty products lang.  Kay kon ugaling madakpan, at least datu pa gihapon.”  Madahaan!

4-in-1 nga proyekto

Gibutyag sa DPWH ang ilang laraw nga motukod og balor P7 bilyones nga mga dam ug reservoir sa pito usab ka mga dagkong sapa sa Cebu kay gawas nga maka-pugong sa baha ang maong proyekto, maka-generate usab kini’g kuryente, makapatubig sa mga umahan ug maghatag og tubig sa kabalayan.  Lab-as pa sa panumduman sa katawhan ang nangalisbo nga baho sa kurapsyon sa flood control projects busa ari na usab ang DPWH mosapigad sa mga dam.  Matud pa sa akong amigo, “Daghang politiko ang mosuporta ni’ng maong proyekto kay gawas sa pagtubag sa panginahanglan, mora man usab kini’g kape nga 4-in-1.”  Pagkatoytoy!