Lig-on ug malungtaron
Pasayloa, naglibog ko unsay trabaho sa presidential adviser for sustainable and resilient communities. Ang pasalamat sa opisyal nga gitudlo ug ang pagpasabot sa opisyal nga nagtudlo wala makatabang sa pagpatin-aw unsay kapuslanan sa bag-ong upisina.
Maong, bisan dili takos, mangahas ko og tugkad angay bang gastohan sa buhis sa katawhan ang bag-ong sanga sa burukrasya. Sugdan nato pinaagi sa pagsuway og Binisaya sa bag-ong na-imbento nga posisyon (hinaot dili makadugang sa kalibog): “Magtatambag sa presidente para sa malungtaron ug lig-on nga mga komunidad.”
* * *
Aron mobilib ang mga magbubuhis nga nahibawo ta sa atong gibuhat, magsuwat dayon ta sa opisyal nga job description:
Ipaubos ang bag-ong upisina sa bag-ong tukoron nga Office of Administrative Circularity (OAC), nga maoy payong sa tanang puwesto nga walay klarong trabaho pero nindot paminawon; ug
Ibutang sa salary grade nga malungtaron ug lig-on ang mga benepisyo.
Ang magtatambag maoy arkitekto sa malungtaron nga kalig-on, moseguro nga ang tanang lig-on nga mga komunidad malungtaron sa ilang mga paningkamot nga magpabiling lig-on ug malungtaron. Maghimo siya og mga programa sa malungtaron nga lahutay nga motutok sa kalig-on sa mga programa.
* * *
Mga responsibilidad:
Pagpatuman sa, pasayloa naglisod ko unsaon pag-Binisaya, Sustainable Resilience Initiatives (SRI) nga molikay sa pagsapaw sa Resilient Sustainability Programs (RSP);
Pagpasiugda og binuwan nga “Synergy Summits” nga motapok sa tanang eksperto aron komprehensibo nga matuki ang kamalungtaron sa kalig-on ug kalig-on sa kamalungtaron, nga dili magpadala sa tentasyo sa pagklaro sa direksiyon; ug
Paghimo og makapakugang nga 50 anyos nga plano sa kalig-on nga molungtad bisan dili mahitabo nga mapatuman aron magpabiling lig-on ang sukaranan nga pundohan sa walay kataposan.
* * *
Key Performance Indicators (KPIs):
Molungtad sa payroll sa gobyerno sa tibuok tuig nga walay bisan usa ka proyekto nga malusad pero puno sa lig-on nga mga saad aron nga walay bisan usa ka kongresista ug senador nga mangahas pagkuwestiyon (bahala nang hilabtanon nga mga sakop sa media);
Pagdugang og labing menos 25% sa mga higayon nga masuwat ang mga pulong nga “malungtaron” ug “kalig-on” sa nasudnong budget; ug
Pagpalig-on sa kahigayonan nga 0% sa mga magbubuhis ang makasabot sa bag-ong upisina aron nga dili makasugakod sa pagpaabot og klaro nga resulta.
* * *
- Latest
