LUPON Award!

Ang Department of the Interior and Local Government (DILG) nagpasiugda na usab og search for outstanding Lupong Tagapamayapa ug nalipay ko kay ang mga Lupon sa Barangay Apas naapil sa pito ka barangay nga napilian atol sa pre-validation sa 80 ka barangay sa siyudad.

Ang Lupong Tagapamayapa Incentive Awards (LTIA) gituyo pagmugna sa DILG aron paghatag og pasidungog sa mga Lupon nga maayo og serbisyo sa paghusay sa mga panagsungi tali sa mga lumolupyo nga nagpuyo sulod sa usa ka local government unit.

Pero ang sugyot gyud unta nako mao nga ang DILG mohimo og duha ka kategoriya, Urban ug Rural barangays. Mangutana mo og ngano? Base sa rekords sa DILG pipila lang ka kaso ang masang-at sa Lupon sa mga mountain barangays, kon itandi sa mga barangay sa urban areas.

Bisan pa og ibutang nato nga ang usa sa basehan sa Lupon nga mapasidunggan mao kadtong dunay mga nindot nga pamaagi sa paghusay sa panagsungi nga masang-at kanila, makapabor gihapon ang mga barangay nga duna la’y pipila ka kaso.

Mao nga gitan-aw nako ang lista sa pito ka barangay nga naapil sa pre-validation, kadaghanan niini mga mountain barangay. Ang mga Lupon sa barangay nga gamay ra og kaso, mahimo man nga mosuroy sa dapit sa mga nagkasungi nga lumolupyo.

Apan sa mga barangay nga ania sa urban area nga pwerteng daghana nga mga kaso, dili na kini maato pa sa pagsuroy. Pananglit, ang usa ka barangay sa bukid nga napasidunggan sa nanglabay’ng katuigan, 38 ra ka kaso ang nadawat nila sa usa ka tuig, apan sa Apas lang, ang 38 mao kini ang kaso nga madawat namo sa duha lang ka buwan.

Angay sab gyud unta nga ang kadagkoan sa DILG mohimo og pagsukod sa kinaadman sa mga sakop sa Lupon kabahin sa Katarungang Pambarangay (KP) Law. Himoon kini pinaagi sa “on-on-one” interview sa matag Lupon.

Pinaagi niini, nagtuo ko nga ang tanang sakop sa Lupon, ilabi na kadtong nangandoy nga mapasidunggan sa LTIA, magtoon na gyud pag-ayo sa mga balaod ug lagda nga angay nilang himoon kon tahasan na sila sa paghusay sa usa ka panagsungi.

Nagpasalamat ko nila ni DILG City Director Jonah Pino ug ni Local Government Operations Officer VII Michael V. Eltanal kay atol sa bag-ohay pa lang namo nga seminar kabahin sa KP Law, nindot kaayo sila nga mipasabot sa isyu, ilabi na ang kabahin sa Venue and Jurisdiction.

Mabuhay ang mga sakop sa Lupong Tagapamayapa nga miabag aron nga momenos ang mga kaso nga moabot sa korte.