Dress code

Miani og dakong kontrobersiya ang pagduaw ni Senador Imee Marcos didto sa Basilica Minore del Sto. Niño ning dakbayan sa Sugbo aron pagdagkot og kandila sa niaging adlaw.

Nagubot ang social media gumikan sa hulagway ni Marcos nga nag-sleeveless sulod sa basilica tungod kay nakalapas kuno ang senadora sa dress code sa maong simbahan.

Matud sa uban nga tungod kay senador lagi ug ilado nga personalidad, wala kunoy sabod ang pagsulod niya sa maong basilica. Pero kadto kunong mga yanong deboto di gyud kuno makasulod basta ang attire supak sa nalatid sa dress code.

Gumikan niini, niisyo ang kadagkoan sa basilica og pahimangno alang sa katawhan sa pagsunod sa dress code kon buot gayud mosulod sa simbahan. Apan bisan paman niini, nasentro ang tanang batikos ngadto sa senadora.

In fairness ni Marcos, dili sad tingali angay nga siya ang hasngan sa tanang batikos gumikan sa maong kontrobersiya. Basin pud siguro kon wala masayod ang senadora sa dress code nga gipatuman sa basilica.

Kon nahibalo lamang si Marcos sa maong dress code, imposible nga mosulod gayud siya sa basilica niadtong higayona. Isip usa ka Kristiyano ug Katoliko, respeto gayud siguro ang mopatigbabaw sa hunahuna sa senadora.

Ambot pud nganong walay usa sa mga body guards ug kuyog ni Marcos ang nahibalo sa dress code aron maingnan pud unta siya. Usab siyaro pud ang mga guwardiya sa basilica nganong wala mopahimangno sa senador kabahin niini.

Mao sad lagi ning problema sa social media karon. Aron lagi nga makapadayag dayon sa gibati, usahay malimot na hinuon ta moanalisar sa sitwasyon ug dayon lamang og click aron lagi makaani og daghang engagement.