EDITORYAL - Dress code

Napuno sa pagsaway o bash sa social media ang presidential sister nga si Senador Imee Marcos tungod sa iyang gisuot sa dihang siya nanagkot diha sa Basilica Minore del Sto. Niño kagahapon, Enero 10,2025.

Kini human sa mga hulagway sa post sa The Freeman sa senador nga nanagkot og kandila ug naglitok og mga pag-ampo samtang nagsuot kini og pula nga bestidang mubo og bukton.

Ang maong post miani og mga pagsaway sa mga netizens nga namasangil sa kaparian nga may gipaboran sa pagpatuman sa dress code sa simbahan.

Kaning dress code nga gipatuman diha sa basilica kun kahinumdoman nga naisyu sab kini sa miaging tuig sa dihang usa ka magtutudlo nga sakop sa LGBT nga nagtrabaho sa Taiwan ang wala nila pasudla tungod sa kamubo sa gisuot niini.

Nag-viral kadto sa social media ang ilang panaglalis sa gwardiyang babaye. Hangtud nga nipagawas og pahibalo ang kaparian sa basilica nga duna nay dress code nga kinahanglang sundon sa mga gustong mosulod.

Tinuod gituman kini sa kadaghanan, apan sa senadora, daghan ang nakasaway ug gi-bash apil ang kaparian.

Paspas sab kaayong nagpagawas og “advisory” kaparian sa basilica bahin sa dress code nga kinahanglan gyud sundon “bisan kinsa pa.”

Kang kinsa man gyud kini nga sayup, sa senadora ba o sa mga gwardiya? Nganong wala may gwardiya o bisan nalang sa iyang mga staff aron sultihan bahin sa dress code?

Di man tingali mamugos ug ikalain sa senadora ang simpleng pagpahibalo kaniya bahin ana. Ikaduha, syaro walay Cebuano nga kauban sa panon sa senadora nga nasayud anang dress code?

Dili man tingali makatarunganon nga ang senadora nga dili taga Cebu maoy sawayon kay bisita ra man siya dinhi ug wala tingali siya nasayod anang dress code sa basilica.

Husto ang punto sa usa ka post sa social media sa Whisper from Wall’s Post nga nikwestyon kun asay importante, ang debosyon ug pagtuo ba o ang kung unsay gisul-ob sa mosulod sa basilica.

Unsaon nalang kung kabus ug gisi ra gyud nga sinina nga wala nay bukton apan gustong modagkot o mohikap sa Imahen sa Senyor Sto. Niño, di na pasudlon?