EDITORYAL - Nagsugod na si Trillanes

Gitinuod ni kanhi senador Antonio Trillanes III ang pagpasaka og plunder cases batok nilang kanhi presidente Rodrigo Duterte ug ni Senador Christopher Lawrence “Bong” Go ug sa pamilya niini diha sa Office of the Ombudsman.

Kasong kalapasan sa Plunder Law, Anti-Graft and Corrupt Practices Act, ug Code of Conduct and Ethical Standards for Public Officials and Employees ang iyang gipasaka ug apil sa iyang gikasohan ang amahan ug half-brother ni Go nga matud niya maoy tagiya sa construction firms nga CLTG Builders ug Alfrego Builders.

Ang pundo nga matud pa gi-divert,  nagkantidad og P7 bilyones gikan sa tuig 2016 hangtud karon, didto sa Davao City ug sa ubang lugar sa Davao region nga kabanay sa mga Duterte ang naglingkod nga mga mayor o uban pang posisyon. Apil sa nabulahan ang kontrobersyal nga magtiayong contractors nga silang Curlee ug Sarah Discaya. Matud niya kaning mga kontrataha nakuha pinaagi sa political connections ug impluwensiya nila sa gobiyerno.

Sagul-sagol ang reaksyon sa mga netizens diha sa social media, daghan ang nalipay tungod aning presko pa kaayong isyu sa kurapsyon sa flood control projects.

Dunay nga misaway kang Trillanes, sagad nila mga supporters sa mga Duterte nga hangtud karon padayun ang pagdumot sa kanhi senador kay hinungdan nga napriso kini sa International Criminal Court ang kanhi presidente. Kinsa may wala makaila ni Trillanes? Usa siya ka rebeldeg sundalong nangulo sa Oakwood Mutiny tungod sa matud pa kurapsyon sa administrasyong Arroyo ug sa mga ahensiya sa gobiyerno.

Apan bisan paman sa iyang pagka-bilanggo nakadaog si Trillanes sa eleksyon ug nahimong senador ug sukad niadto nigukod sa mga kurap ug abusadong opisyales sa gobiyerno apan daghan siyang nakaaway nga nakaingon nga wala na siya nakadaog sa mga eleksyon.

Sa panahon ni Duterte, gusto siyang ipapriso pagbalik, gikasohan siya og cyber libel, sedition, rebellion ug uban pa, apan gi-dismiss kining tanan sa Korte Suprema.

Si Go sa iyang press conference miingon nga sayup og gipaghot si Trillanes, apan para niya makahigayon na siya sa pagtubag sa mga pasangil kaniya diha sa haom nga venue nga mao ang korte.