EDITORYAL - Dili tagdon

Dili tagdon. Mao kini ang angayang buhaton sa Pilipinas aning pagbuot-buot sa China og imponer og restriksyon sa atong mga mananagat diha sa atoang Scarborough Shoal o Bajo de Masinloc sa lungsod sa Masinloc sa Zambales.

Ning bag-o, ang Philippine Coastguard mibutyag nga gi-radio challence sila sa mga barko sa China diha sa Scarborough Shoal kay matud pa gikonsiderar nila nga “environmental reserve” nila ang maong lugar. Kinsa man sila nga mo-imponir og balaod sa atoang tugkaran?

Mao kini ang labing unang higayon nga ang Beijing migamit og susamang rason aron abugon ang mga Pilipino sa kaugalingon niining tradisyonal nga panagatan.

Ang Scarborough Shoal sakop sa lungsod sa Masinloc, gatosan ka milya ang distansya gikan sa pinakaduol nga baybayon sa China.

Matud pa gi-harass sa China ang mga barko sa Bureau of Fisheries and Aquatic Resources (BFAR) nga naghatud og supply sa mga mananagat didto niadtong adlaw nga Lunes, Oktobre 13 ug sa Escoda Shoal diha sa West Philippine Sea.

kini sa Kadiwa para sa Bagong Bayaning Mangingisda program sa gobiyerno diin dul-an 100 ka fishing boats sa Pilipinas ang nanagat karon didto bisan pa sa presensiya sa sobra 40 ka mga barko sa China didto nga gikuyogan sa ilang coast guard, maritime militia, ug ilahang People’s Liberation Army Navy.

Ang maong pagbuot-buot sa China makadiskaril sa kaugmaon sa mga Pilipino. Kung pasagdan sila og dili babagan, tabla ra og gi-surrender sa Pilipinas ang katungod niini sa maong shoal.

Ang maong lugar gideklarar sa Arbitral Tribunal nga gipanagiya sa Pilipinas ug walay laing dunay katungod sa lugar kondili ang mga Pilipino lamang.

Apan ang China nga halos giangkon nga ilaha ang 90 porsiyento sa South China Sea diin nahimutang ang WPS, niinsister nga ilaha kini ug dili gustong tahuron o ilhon ang international law.

Walay intensiyon ang China pagtukod og artipisyal nga isla sa Scarborough kay sayud kining maabot kini sa mga armas sa Pilipinas ug kun magkagiyera dili nila kini madepensahan og dugay.

Apan ilaha kining gamiton aron anhi motutok ang Pilipinas ug mapasagdan ang ubang mga isla niini sama sa Munisipyo sa Kalayaan Islands diin nahimutang ang Pag-asa Island ug uban pa.