Daghang wa kasabot

Ang huwes maoy nagmando nga ibutang sa rekord nga mi “Plead not guilty” si kanhi Negros Oriental Congressman Arnulfo Teves sa kaso nga illegal possesion of firearms and explosives nga giatubang niya sa korte.

Gipaatubang si Teves sa hukmanan atol sa arraignment kaniadtong Huwebes, apan dihang gipangutana siya kon “guilty” ba siya o “not guilty,” wa motingog ang akusado.

Kini maoy rason nga napugos ang huwes pagmando nga ibutang sa rekord nga plead not guilty ang plea ni Teves. Daghanang nangasuko uy, kay abi man nila og gihukman dayon sa huwes nga way sala si Teves. Tugoti ko nga akong ipasabot. Dili ko abogado, apan nagbasa ko og libro sa balaod, ug dugay ko nga nadestino sa Palace of Justice isip reporter mao nga nasuhito ko niini.

Gilatid sa Rules on Criminal Procedures nga kon atol sa arraignment sa kaso, ang akusado dili motingog kon pangutan-on na siya “guilty” ba siya o dili, ang huwes kinahanglang mobutang nga “not guilty.”

Apan wa kana magpasabot nga abswelto na ang akusado. Kinahanglan pa nga ipadayon ang trial sa iyang kaso, ug paminawon ang mga ebidensya nga ipresentar sa prosecutor, ug hatagan ang abogado sa akusado pagtubag.

Makalingaw basahon ang mga komentaryo sa mga tawo sa maong kaso kay ang uban magpakamao, apan wa diay mahusto ang ilang pamahayag ug mahulog ra sila nga kataw-anan.

* * *

Nakagusto ko sa gihimo ni Senate President Pro Tempore Jinggoy Estrada nga mipasaka og balaodon nga magwagtang na sa senior high school. Ang tinuod, bisan ang mga senador karon, ang mga maestra, wa na sila mag-agi og senior high school apan nganong utokan man sila? Ikaw? Nag-agi ka ba og senior high school?

Tinonto man gud to ni DepEd Secretary Fermin Luistro nga ipamareho niya sa ubang nasud nga dunay K-12 nga sistema sa edukasyon, aron kuno dili ta mabentahaan sa pagpangaplay og trabaho sa gawas.Pastilan. Unya kon ang usa ka bata way ambisyon nga manarbaho sa gawas kay anhi ra siya sa Pilipinas, ang bata tawon ug ang iyang mga ginikanan mabuktot sa paggasto kay dugay man siya makahuman?

Tiaw mo, second year college na unta ang bata, apan tungod kay gipun-an man og duha ka tuig nga senior high school, igo pa siya nga nakahuman sa sekondarya?

Pabor ko sa gisugyot ni Estrada nga himoong requirement nga ang bata moagi gyud og Kindergarten sa dili pa moeskwela sa Grade 1, apan wad-on na ang senior high school.

Ako, usa ko sa nabuktot sa pagpaeskwela sa akong anak nga imbes human na unta sa iyang kurso, karon second year college pa.